Komisionet hetimore vijojnë të simbolizojnë dështimin në vendin tonë. Edhe pse ngrihen me bujë të madhe dhe në fokus të trajtimit janë çështje shumë të rëndësishme, puna e këtyre komisioneve asnjëherë nuk shkon deri në fund. Përveç rastit të komisionit hetimor të ngritur për aferën e CEZ, i cili përfundoi me një kallëzim penal në prokurori, të gjithë të tjerët mund të themi se janë në histori si të dështuar. Vetëm në katër vitet e fundit, Partia Demokratike dhe Partia Socialiste kanë nisur investigim për 9 çështje, por asnjë prej tyre nuk ka marrë zgjidhje.
Grupit të komisioneve të dështuara iu bashkëngjit edhe ai i ngritur për hetimin e ish-ministrit të Brendshëm, Saimir Tahiri dhe fenomenit të drogës në vend. Ky komision u ngrit plot 6 muaj më parë me kërkesë të demokratëve, por sot afati ligjor i funksionimit të tij përfundon. Kërkesa për ngritjen e tij ishte e demokratëve për shkak të skandalit që plasi me ish-ministrin Tahiri dhe implikimin e përfolur të tij në trafik droge. Por komisioni hetimor nuk e vazhdon dot më tej hetimin e tij.
Përgjatë këtyre gjashtë muajve duhet të ishin zhvilluar diskutime të rëndësishme sa i takon lidhjeve të politikanëve me krimin dhe fenomenit të drogës, madje për këto çështje duhet të kishin dalë edhe fakte të reja dhe interesante. Por në vetëm 4 mbledhjet e zhvilluara gjithsej, puna e komisionit hetimor u kufizua vetëm me akuzat politike dhe dërgimin e shkresave për informacione nëpër institucionet shtetërore.
Për këto shkresa u zhvillua edhe një debat shumë i fortë mes anëtarëve opozitarë dhe mazhorancës në mbledhjen e fundit, sepse Partia Socialiste kërkonte që përveç të tjerash, të merrte të dhëna nga institucionet shtetërore edhe për lidhjet e Shkëlzen Berishës me drogën; çështjen e Lazaratit dhe mos-ndërhyrjen në këtë zonë nga kryeministri i asaj kohe, Sali Berisha si edhe për lidhjet e mundshme mes Klement Balilit dhe ish-ministrave të LSI. Duket se këto çështje e trembën opozitën, duke qenë se ky komision nuk u thirr më asnjëherë për të zhvilluar mbledhjen e radhës.
E vetmja kartë që mund të luhet për vijimin e punës së komisionit hetimor mund të jetë kërkesa e opozitës për të zgjatur afatin e tij, por gazeta tentoi të kontaktonte me kryetarin e komisionit, Edi Paloka, mirëpo nuk mori përgjigje. Mesa duket hetimet për Tahirin, Shkëlzen Berishën dhe Klement Balilin i përkasin tani të shkuarës, me përfundimin e afatit.