Deputeti demokrat Ervin Salianji është shfaqur në gjendje të rënduar në studion e “News 24”, ku është konfliktuar me gazetaren Ola Bruko.
I pyetur lidhur me çështjen “Babalja” dhe konkluzionet e hetimeve në bazë të rezultateve të laboratorit britanik dhe analizave të tabulateve telefonike, ligjvënësi nuk ka pranuar asgjë.
Ai nuk ka pranuar pyetjet e gazetares mbi hetimet, duke e intimiduar drejtpërdrejtë.
“Po ju toleroj si shumë unë juve”, tha Salianji.
Bruko i ka kërkuar deputetit që të qetësohet pasi i dukej i shqetësuar, ku i kujton se ajo si gazetare duhet të bëjë çdo pyetje në interes të publikut.
Më tej, ajo ironizon duke i thënë se nuk mund të qëndrojë si “kukull” para tij dhe të dëgjojë fjalimin e tij.
“Jeni në studion time të lajmeve. Nëse me ngatërroni me një kukull, ngatërroheni rëndë zoti Salianji. Unë jam këtu për t’u bërë pyetje, ju duhet të përgjigjeni”, tha gazetarja.
Acarimi i deputetit ka ardhur nga rezultatet e hetimeve dhe nga bashkëpunimi me drejtësinë i dëshmitarit Fredi Alizoti.
Ai është një prej të arrestuarve për audiopërgjimin e publikuar dhe ka pranuar vetë se ai ka bërë rolin e Agron Xhafajt, në këmbim, sipas tij të një shume prej 200 mijë eurosh, që bashkëpunëtori tjetër Albert Veliu i kishte thënë se do i merrnin nga Salianji.