Kryeministri Edi Rama ka paralajmëruar furtunë në qeveri. Gazeta “SOT” e paralajmëroi se shefi i qeverisë pas vendimit të negociatave do të niste shkarkimin e ministrave dhe dje u vendos që ndryshimet të ndodhin në shtator dhe jo në qershor. Ditën e djeshme u mblodh Asambleja Kombëtare, teksa i pari i qeverisë ka paralajmëruar ministrat dhe krerët e degëve të PS se kushdo që ka dështuar në misionin e tij do të largohet.
Madje, duke u ndalur te ministrat, Rama tha se në shtator do të bëjë një vlerësim se kush janë ata që duhet të largohen nëse nuk kanë bërë detyrën, por edhe anëtarët e Kryesisë dhe sekretariatit, ndërsa shtoi ministrat që janë edhe drejtues qarqesh, do të vlerësohet nëse do i mbajnë të dy postet. “Ne do të vlerësojmë çfarë ndryshimesh mund të bëjmë në qeveri në shtator, se cilat ministri nuk janë në lartësinë e kësaj nevoje, jo thjesht të tregojnë shifra e statistika, por të kenë vendin e tyre në mendjen dhe zemrat e atyre që na kanë dhënë besim.
Do shohim cilët anëtarë të partisë do të largohen nga kryesia dhe cilët janë të rinjtë që duhet të vijnë, si ka punuar sekretariati dhe cilët do vijnë, cilët janë kryetarët e PS që do të ikin, detyra kryesore është bashkëqeverisja.Si mundet që të kemi bashki, që kryetarët e partive nuk e kanë marrë vesh. Deputetëve u duhet dhënë mundësia të kenë pikën e referimit. Ku janë kryetarët e partive? Nuk ua ka dhënë njeri detyrën të merren me punësime, ka që e bëjnë, duhen shkarkuar”, deklaroi ai.
Ja kush janë ministrat më të rrezikuar
Gazeta ka mësuar prapaskenat e ndryshimeve në qeveri. Rama paralajmëroi largime në shtator, ndërsa janë disa shkaqe që e kanë nxitur të ndërmerrte një veprim i tillë. Sipas burimeve, kryeministri është i pakënaqur me ritmin e shkarkimit të militantëve të LSI në administratë. Shumë militantë të PS janë pa punë dhe shumë të LSI janë në funksione të larta. Edhe pse Rama ka urdhëruar disa herë ministrat të urdhërojnë shkarkime drejtorësh, ka nga ata që nuk i kanë zbatuar.
Por kush janë ministrat më të rrezikuar? Gazeta ka mësuar se janë disa komponentë të rëndësishëm, tek të cilët do të bazohet kryeministri për të qenë i qartë sa i takon lëvizjeve apo shkarkimit në radhët e ministrave. Kështu, të parët që janë më të rrezikuar do të jenë ata ministrat të cilët nuk kanë zbatuar urdhrin e kryeministrit në lidhje me shkarkimin e militantëve të LSI nga administrata shtetërore.
Po ashtu, të rrezikuar për t’u shkarkuar do të jenë edhe ata ministra të cilët kanë një performancë të dobët sa i takon objektivave. Madje, gazeta mësoi se për këto do të bëhet edhe një ballafaqim mes atyre çfarë u premtua nga ministrat kur u emëruan dhe gjendjes reale. Nga ana tjetër, mësohet se të rrezikuar për t’u shkarkuar janë edhe ata ministra që nuk kanë përmbushur me korrektësi reformat e kërkuara nga BE, në kuadër të integrimit.
Drejt shkarkimit do shkojnë edhe ata ministra, për të cilët gjatë disa raporteve të dorëzuar nga baza ka pasur ankesa nga qytetarët, anëtarët socialistë apo krerët e degëve. Ndërsa, burimet thanë se të rrezikuar do të jenë edhe ata ministra për të cilët janë shfaqur kritika tek platforma “Shqipëria që duam”.