Protestuesit pro-rusë u mblodhën këtë të dielë për të dytën ditë radhazi në Gjermani, duke kërkuar fundin e diskriminimit ndaj popullsisë së madhe rusishtfolëse që nga shpërthimi i konfliktit në Ukrainë.
Qindra njerëz marshuan në qendrën financiare të Frankfurtit, duke valëvitur flamuj rusë nëpër duar.
Një demonstrim i përmasave të ngjashme u zhvillua dhe në qytetin verior të Hanoverit, i shoqëruar nga një kolonë prej qindra makinash.
Megjithatë, tubimi u vonua për shkak se autoritetet gjermane vendosën se automjetet nuk mund të mbuloheshin me flamuj.
Organizatorët thanë se qëllimi i tyre është të vendosnin në qendër të vëmendjes intolerancën në rritje ndaj rusëve që jetojnë në Gjermani.
Shumë vëzhgues kanë vënë në dyshim protestat janë shfaqje të maskuara hollësisht në mbështetje të luftës. Dy tubimet u shoqëruan nga kundër-demonstrata në mbështetje të Ukrainës.
Diaspora e madhe ruse e Gjermanisë
Gjermania është shtëpia e 1.2 milionë njerëzve me origjinë ruse dhe 325,000 nga Ukraina.
Që nga fillimi i pushtimit rus të Ukrainës më 24 shkurt, policia ka regjistruar 383 krime të urrejtjes kundër rusëve dhe 181 vepra kundër ukrainasve.
Të shtunën, autokolona pro-ruse kaluan nëpër disa qytete gjermane.
Një karvan me rreth 190 makina kaloi nëpër qytetin jugperëndimor të Shtutgartit, me moton “Kundër diskriminimit kundër njerëzve rusishtfolës”.
Pjesëmarrësit valëvitën pankarta ku lexonin “Stop Rusofobisë” dhe kërkuan që t’i jepej fund diskriminimit ndaj fëmijëve rusishtfolës në shkolla.
Zyrtarët e qytetit kishin paralajmëruar paraprakisht pjesëmarrësit se ngjarja nuk mund të tregonte mbështetje për konfliktin, duke përfshirë shfaqjen e shkronjave V dhe Z, të cilat janë lidhur me pushtimin rus.
Demonstrimet pro-ruse kanë shkaktuar një reagim të ashpër në Gjermani, ku gazeta Bild e cilësoi atë një “paradë turpi”.