“Unë besoj se nuk varet vetëm nga unë. Besoj se shumica e qytetarëve do të jenë barrikadë e këtij grushti shteti… Do ta lë zyrën kur të bëhen zgjedhje normale. Janë 27 kryetarë bashkish që janë të gatshëm që të mbrojnë Kushtetutën, ligjin.”
Kështu shprehej më 5 korrik ish-kryebashkiaku i Kamzës, Xhelal Mziu, në një intervistë për Top Channel. Edhe gjatë mëngjesit të sotëm, pati një rezistencë nga mbështetës të Partisë Demokratike që deklaruan se nuk do e lejonin Rakip Sulin, kryebashkiakun e ri nga radhët e PS, që të merrte bashkinë e Kamzës.
Por ashtu si në bashkitë e tjera që drejtoheshin nga të djathtët përpara 30 qershorit, edhe në Kamëz socialistët hynë në bashki pas përfundimit zyrtar të punës.
Këto pamje të Rakip Sulit, të bëra këtë pasdite brenda zyrës kur rrinte Mziu, tregojnë qartësisht se ky i fundit ishte përgatitur për të dorëzuar ‘bastionin e demokratëve’. Zyra është totalisht e boshatisur dhe prej aty janë hequr të gjitha dokumentet apo fotografitë që mbante Mziu më herët.
Dallimi bëhet edhe më i qartë nëse krahason pamjet e sotme me fotot kur shfaqej Xhelal Mziu në pozicionin e kryebashkiakut.
Madje, edhe çelësat e zyrës së kryebashkiakut ishin brenda në bashki dhe mbështetësve të PS nuk u është dashur të hyjnë aty me forcë.
I pyetur nga gazetarët nëse kishte një mesazh për paraardhësin, i cili ia kishte lënë zyrën gati, Suli tha: “Unë nuk e njoh se kush është ky. E njoh si ish-kryebashkiak që ka ndryshuar veten dhe jo Kamzën.”
