“Ne o përballemi ose hapim krahun, kjo është përgjegjësia!” Kështu u shpreh Paloku i Foltores kur u pyet nëse Rithemelimi do të marre përgjegjësi për humbjen në zgjedhjet e 14 Majit.
Ai u shpreh se ky procesi i njohjes së përgjegjësive ka nisur, me mbledhjen e Kryesisë nga Sali Berisha dhe që do të vijojë me Këshillin Kombëtar, që do të njihet me raportin e grupit të punës për zgjedhjet.
“Jemi vetëm në fillimin e këtij procesi që do të përfshijë të gjithë PD, ku do të ndajmë edhe përgjegjësitë. Ne padyshim duhet që defektet që kemi brenda vetes ti përmirësojmë.
Nëqoftë se nuk marrim përsipër përgjegjësi, duke marrë përsipër të rrëzojmë këtë qeveri. Nëse nuk e marrim dot përsipër iu kam thënë edhe të tjerëve, iki që nesër unë dhe bëhem ushtar i tij nëse më thotë se di formulën si ta rrëzojë këtë qeveri”, tha ai.
Paloka u shpreh se ka ardhur koha që deputetët e Rithemelimit të tregojnë se janë të bindur se dinë si të rrëzojnë Edi Ramën dhe për të zgjidhja e vetme është përballja me forcë me regjimin.
“Përgjegjësia jonë përballë shqiptarëve është se duke njohur këtë realitet, jemi të bindur se me Edi Ramën kryeministër në Shqipëri nuk do të ketë kurrë zgjedhje. Por kjo nuk duhet të jetë një skuzë për ne, një justifikim, të hyjmë në zgjedhje e të themi se na i vodhën, kjo nuk duhet të vazhdojë më.
Ne ose përballemi me një qeveri që është kjo që është, që vjedh, që përdor gjithë mjetet që ka në dorë, paratë e pista, narkotrafikantët gjithçka për të marrë zgjedhjet, ne duhet të ndajmë mendjen. A do të përballemi ne me këtë realitet, me këtë qeveri. Si fillim duhet të themi po ne s’kemi rrugë tjetër.
Duhet të përballemi me këtë qeveri dhe për mua përveçse përballjes me forcë me këtë qeveri nuk kemi zgjidhje tjetër. Nuk kemi tentuar ndonjëherë me forcë, me atë lloj force që them unë. Regjimet nuk rrëzohen as me protesta paqësore, as me djegie mandatesh, se ajo qe gafa më e madhe që bëmë.
Rama përfitoi bleu ata deputetë pasues që ishin aty dhe ndryshoi Kushtetutën duke bërë thuajse të pamundur që një opozitë dhe ligjërisht të garojë në zgjedhje. Regjimi nuk rrëzohet me vota se nuk të lë të bësh zgjedhje. Me protesta të fuqishme tha Berisha dhe jam dakord”, tha Paloka.
Paloka komentoi edhe zgjedhjet në PD-në zyrtare, ku Lulzim Basha u rikthye si kryetar pas fitores me mbi 14 mijë vota përballë Gjergji Hanit.
“Është serioz për dëmet që po i bën Partisë Demokratike dhe shqiptarëve në përgjithësi. Bile unë te një reagim që pata në fillim e quajta dhe kriminale. Praktikisht Basha sot për demokratët është një armik i tyre, pasi është me mision në shërbim të Edi Ramës.
Rama sot e do Bashën për vitin 2025, që siç ia shiti apo fali numëruesit e PD më 14 Maj kështu do jetë edhe në 2025. Dhe së dyti ata 5 kokrra deputetë që i kanë ngelu Bashës i do në Parlament për të kaluar ndonjë ligj me shumicë të cilësuar”, nënvizoi ai.