Opozita e Bashkuar ka dalë dje kundër ndryshimeve kushtetuese. Me anë të një deklarate të përbashkët, opozita ka deklaruar se është kundër hapjes së listave dhe koalicioneve parazgjedhore. Në deklaratë ajo shprehet se dënon me forcë tentativën e Ramës për të prishur marrëveshjen e 5 qershorit për reformën zgjedhore.
“Opozita e Bashkuar dënon me forcë tentativën e Edi Ramës për prishjen e marrëveshjes së 5 Qershorit për reformën zgjedhore. Ky akt i paprecedentë prish konsensusin e arritur me ndërmjetësimin dhe mbështetjen e partnerëve tanë strategjikë SHBA dhe BE, vë në rrezik stabilitetin e vendit, si dhe dëmton seriozisht shanset e Shqipërisë për nisjen e negociatave të anëtarësimit me Bashkimin Europian. Ky veprim diabolik po kryhet vetëm për pushtetin personal të Edi Ramës dhe motivohet prej frikës së tij nga zgjedhjet.
Ai dëmton rëndë interesat e qytetarëve shqiptarë, të cilët janë braktisur dhe tradhtuar nga kryeministri në ikje, duke i lënë të vetëm përballë krizës më të thellë të pandemisë dhe atë ekonomike që është pasojë direkte e dështimit dhe papërgjegjshmërisë së tij dhe qeverisë së tij”, thuhet në deklaratën e përbashkët të opozitës së bashkuar. Opozita ndër të tjera thekson se kjo është tentativë e njëanshme dhe pa konsensus mes palëve.
Sakaq opozita ka deklaruar se për marrëveshjen e 5 qershorit janë informuar edhe presidenti edhe partnerët ndërkombëtarë. Ajo që vihet re është se opozita ka kërkuar ndihmën e presidentit edhe pse ky i fundit nuk ka folur ende për ndryshimet kushtetuese, duket se po punon në prapaskenë.
“Kurrë më parë nuk ka ndodhur që të ndryshohet Kushtetuta e Shqipërisë dhe rregullat e lojës së një gare elektorale në mënyrë të njëanshme dhe pa konsensus mes palëve pjesëmarrëse në zgjedhje. Ky provokim i ulët dhe sjellje tipike prej autokrati që ka frikë nga zgjedhjet e lira e të ndershme, synon të nxisë konflikt politik në vend në prag të zgjedhjeve të ardhshme, që janë kyçe për demokracinë dhe ecurinë e Shqipërisë në rrugën e saj europiane.
Opozita e Bashkuar ka informuar zyrtarisht gjatë ditës së sotme Presidentin e Republikës dhe partnerët tanë strategjikë për këtë akt të paprecedentë që acaron më tej klimën politike në vend dhe e fut Shqipërinë në një kurs zhvillimesh të paparashikueshme. Opozita e Bashkuar ka qenë dhe mbetet plotësisht e angazhuar në përmbushjen e thirrjes së Sekretarit Amerikan të Shtetit, Mike Pompeo, Përfaqësuesit të Lartë të Bashkimit Europian, Joseph Borrel dhe Komisionerit për Zgjerimin, Oliver Varhelyi për kodifikimin pa ndryshime të marrëveshjes së 5 Qershorit, sa më shpejt në Parlament”, thuhet në deklaratë.
Basha akuza Ramës për lojë të pistë
Po ditën e djeshme, kreu i Partisë Demokratike ka hedhur akuza ndaj kryeministrit Edi Rama, duke thënë se ai është duke bërë një lojë të pistë politike. Dje kryedemokrati Basha, sikurse ai vetë ka bërë me dije, ka qenë në një vizitë pranë një fasonerie në Kombinat, ku ka bashkëbiseduar me punëtorët e atjeshëm.
Sakaq me anë të një postimi në Facebook, Basha ka përdorur takimin për të hedhur akuza ndaj Ramës, ku thekson se ai po provon çdo lojë politike për të hequr vëmendjen nga dështimi në menaxhimin e pandemisë. Por në një moment kur në qendër të diskutimeve politike ndodhet hapja e listave dhe heqja e koalicioneve, duket qartë se mesazhi i Bashës ka qenë për këto dy tema.
“Edi Rama po provon çdo lojë të pistë politike për të hequr vëmendjen nga dështimi i tmerrshëm në menaxhimin e pandemisë dhe nga kriza ekonomike, që shqiptarët po e vuajnë çdo ditë dhe që po zbraz xhepat e tyre”, është shprehur kryedemokrati Basha.