Presidenti i Dhomës së Tregtisë së Serbisë, Marko Çadezh, ftoi sot biznesmenët dhe kompanitë nga Shqipëria dhe Maqedonia e Veriut që, si anëtarë të “Open Balkan“, të përdorin Business Hub të Serbisë.
Kjo ftesë u lëshua në Expo2020Dubai, që njihet ndryshe si ekspozita më e madhe në botë.
Çadezh theksoi se përdorimi i Business Hub të Serbisë do të jetë pa pagesë, si dhe do të ofrojë të gjithë mbështetjen dhe ndihmën e nevojshme në marrëveshje për biznese të reja me partnerë jo vetëm nga Emiratet e Bashkuara Arabe, por nga e gjithë bota.
“Në dispozicionin tuaj janë 600 metra katrorë hapësirë biznesi në Zonën e Lirë të Dubai South, ku operon një numër i madh kompanish nga Ikea e deri te prodhuesit më të mëdhenj në botë. Ne do t’ju sigurojmë kushtet për t’u prezantuar, për t’u rrjetëzuar, për të organizuar takime B2B, gjatë të gjashtë muajve sa zgjat ekspozita botërore Expo 2020 Dubai. Ftoj biznesmenët e Maqedonisë së Veriut dhe Shqipërisë që ta përdorin Business Hub-in sikur të jetë i tyre. Kjo është pjesë e nismës së përbashkët “ Open Balkan ”, dhe vetëm kështu mund të jemi më të fortë“, – tha Çadezh gjatë vizitës së tij në pavijonin e Shqipërisë në Expo2020 Dubai, gjatë bisedimeve me kryetarin e Bashkisë së Tiranës, Erjon Veliaj.
Kryebashkiaku Veliaj e falenderoi Çadezh për ftesën që u bëri kompanive shqiptare, ndërsa shtoi se vizitën e tij në pavijonin e Shqipërisë e sheh si një fillim të ri për marrëdhëniet serbo-shqiptare.
“E kuptuam përmes procesit të Ballkanit të Hapur se në këtë jemi bashkë dhe nëse bashkëpunojmë dhe bëjmë atë që dimë më mirë, mund ta nxisim këtë rajon. Ne, si Serbia, jemi të hapur për organizimin e një konference investimi sepse e dimë që keni shumë investitorë që janë të interesuar për marinat tona. E shoh këtë vizitë si një fillim të ri për marrëdhëniet tona, sepse ne jemi praktikë, pragmatikë dhe investojmë të gjithë energjinë tonë në ndërtimin e këtij bashkëpunimi. Fakti që jemi të pranishëm në Expo ka rëndësi për vendet tona, por edhe kryeqytetet tona, ku është përqendruar gjysma e ekonomisë sonë”, – u shpreh Veliaj.
Në bisedë me Bekri Ajdinin, Komisionerin e Përgjithshëm të Maqedonisë së Veriut, Çadezh nuk ngurroi të theksonte rëndësinë e pjesëmarrjes së vendeve të rajonit në Expo2020Dubai.
“Më shumë se 350 biznesmenë nga Serbia morën pjesë në këtë ekspozitë, disa tashmë kanë kontraktuar biznese të reja dhe ftoj të gjitha kompanitë nga Maqedonia e Veriut që të shfrytëzojnë të gjitha mundësitë e ofruara nga Business Hub-i ynë. Ne jemi këtu për të ndihmuar në organizimin e takimeve, do të vëmë në dispozicion gjithçka që ju nevojitet. Sepse ne jemi një rajon, një ekonomi, një treg”, – tha Çadezh.