Sali Berisha një ditë më parë, me anë të “qytetarit dixhital”, tha se drejtori i Ujësjellësit dhe drejtori i Kulturës së qytetit të Laçit ndodheshin në burg për vjedhje në Spanjë.
Sipas tij, ata kishin grabitur shtëpinë e sulmuesit të Real Madrid, Karim Benzema.
Dy drejtorët e akuzuar, Alfred Prodani dhe Edmond Jushi, i janë përgjigjur Berishës, ndërsa kanë folur për Dosja.al
Alfred Prodani, drejtor i Ujësjellësit, Laç: Jam në punë prej disa vitesh.
Nuk kam asnjë lidhje me lajmin e publikuar nga Sali Berisha dhe mediet. Institucionet mund të verifikojnë lëvizjet e mia ku shihet qartë se nuk kam dalë jashtë Shqipërisë.
Kam qenë vetëm disa ditë me leje brenda vendit. Nuk e di se si mund të shpifet kështu dhe të shkatërrohet jeta e një njeriu.
E kuptoj Berishën që e përdor politikisht por nuk kuptoj mediet. Kanë nxjerrë pa të drejtë të dhënat e mia dhe kanë publikuar sikur unë jamë arrestuar, por kjo gjë nuk është e vërtetë.
E njoh edhe Edmondin, kaq qytet është Kurbini, por të dy nuk kemi lidhje me grabitjen e shtëpisë së Karim Benzema.
Edmond Jushi, drejtori i Mirëmbajtjes së Rrugëve Rurale: Kjo është shpifje sade. Unë kam shkuar në Spanjë disa ditë pasi ka ndodhur grabitja.
Por s’kam asnjë lidhje me atë që ka ndodhur në shtëpinë e Benzema-s. Për më tepër (qesh) se jam edhe fans i Real Madridit.
Nuk e di sepse ai plak matuf ma ka publikuar këtë shpifje por të merret me djalin e tij që la nam. Unë nuk kam asnjë lidhje mund të verifikohen të dhënat TIMS që nuk përkojnë.
Për më tepër nëse do kisha bërë grabitje si do të lirohesha dhe do të kthehesha në Shqipëri?!
Kjo është e turpshme, nuk jam arrestuar asnjëherë. E mora vesh sa kam dalë nga shtëpia, më kapën njerëzit dhe më thanë: Ku je drejtor se vodhe edhe shtëpinë e Benzema-s.
Nuk besoj se është sulm politik sepse nuk jam ndonjë politikan i madh.(TemA)