Ish ministri i Brendshëm Saimir Tahiri, nën hetim për dyshimet se ka patur lidhje me një grup trafikantësh të marijuanës, njoftoi sot tërheqjen e tij si deputet dhe dorëzimin e mandatit. Gjatë një komunikimi me mediat, dhe përmes një fjalimi të gjatë zoti Tahiri e shpjegoi vendimin e tij me faktin se “unë nuk jam njëri nga rraca e atyre që rri në parlament për pazar a për shpëtim.”
Duke komentuar këtë akt, gazetari Adriatik Doçi , shkruan se kjo dëshmoi sot se “vijimi i traditës së vëllavrasjes në PS” vijon. Ai sjell edhe rastet konkrete të Bashës dhe Monikës, të cilët edhe pse të zhytur në korrupsion vijojnë ta cilësojnë dorëheqjen e Tahirit, si lojë mes tij dhe Ramës.
“Ish ministri i Brendshëm Saimir Tahiri, nën hetim për dyshimet se ka patur lidhje me një grup trafikantësh të marijuanës, njoftoi sot tërheqjen e tij si deputet dhe dorëzimin e mandatit.Nuk mund ta vë dorën në zjarr për raportin e Tahirit me Habilajt.
Por, sipas mendimit tim, vijimin i traditës së vëllavrasjes në PS është një ndyrësi historike. Nuk mund të trajtohet ish-kreu i PS së Tiranës, ish-ministri i Brendshëm dhe njeriu që mbrojti detin në Gjykatën Kushtetueses, si plagosja e një luani në Afrikë. Sa i takon lojës së pretenduar nga Basha, mos harroni se, Lulzim Basha u shtir tre vjet sikur ishte me temperaturë, për t’i shpëtuar gjykimit me procedurë, për abuzimin me Rrugën Durrës-Kukës.
Vetëm kur u rivesh me imunitet, i ra temperatura. Sa i takon komenteve të Monika Kryemadhit, mos harroni se, zonja Kryemadhi, ka apartamente dhe vila, aq sa kemi ne lugë, pirunë dhe filxhanë në shtëpi, me vetëm dy rroga të deklaruara” , shkruan Doçi.