Pasi dogji skenën e “Eurovision”, aty ku tërhoqi vëmendjen e miliona njerëzve në mbarë botën në muajin maj, këngëtarja me origjinë shqiptare, Eleni Foureira do të vijë në Tiranë të ndezë skenën e sheshit “Skënderbej” më 25 korrik.
Momentalisht, ajo ndodhet në një tur nëpër Europë, që përfshin koncerte në Qipro, Ibiza, Madrid, Barcelonë, Londër, Amsterdam e Stokholm, duke shijuar ende frutet e suksesit të saj pas performancës në Festivalin e muzikës europaine.
Në profilin e saj social, Eleni ka zbuluar se pjesë e turit të saj do të jetë edhe kryeqyteti shqiptar, ku ajo do të performojë më 25 korrik.
Pas dy këngëtarëve Ermal Meta dhe Rita Ora, Eleni Foureira është e treta këngëtare shqiptare me famë ndërkombëtare, që do të performojë në Tiranë.