Ora e llogaridhënies për pushtetarët shqiptarë duket se po afron. Deri më tani, kushdo që ka grabitur qytetarët e ka bërë gjumin qetë, por që kur reforma në drejtësi hodhi hapat e parë, shumë prej pushtetarëve po shohin ëndrra të këqija. SPAK në shtator do jetë gati dhe askush nuk e ka vendin e sigurt. Ata që do fundosin të korruptuarit do jenë padyshim partnerët e huaj, të cilët po kujdesen që reforma të ecë në shina.
Por ajo që pritet të fundosë të korruptuarit është pasuria. Deri më tani shumica e të ngelurve në veting ikën sepse nuk kishin fshehur si duhet pasuritë e korrupsionit. Raportet ndërkombëtare dhe vendase tregojnë se shumë politikanë kanë nxjerrë para jashtë. Madje ka pasur dhe akuza se në Qipro janë dërguar para me helikopter. Por më i rrezikuari i momentit është një pushtetar i lartë në vend, i cili ka fshehur plot 80 milionë euro në Londër. Gazeta e ka deklaruar kohë më parë se si ky emër i njohur në vend ka përdorur teknika të ndryshme, duke dërguar paratë në bankat e Londrës dhe është kujdesur shumë që të mos zbulohet. Por në prag të SPAK, Londra ka marrë angazhim t’i japë fund pastrimit të parave nga bandat dhe të korruptuarit shqiptarë. Pak kohë më parë u godit djali i ish-kryeministrit moldav, të cilit ju sekuestruan mbi 500 mijë stërlina. Por duket se tani është radha e pushtetarëve ballkanas. Pak ditë më parë u mbajt samiti i Poznan në Poloni, fokusi i të cilit ishte bashkëpunimi ekonomik mes Ballkanit dhe BE. Por në atë samit është nënshkruar një marrëveshje tepër e rëndësishme, e cila ka kaluar në heshtje. Organizata për Raportimin e Krimit të Organizuar dhe Korrupsionit (OÇRP) dhe Agjencia e Pavarur e Lajmeve të Ballkanit (IBNA), kanë bërë të ditur se Shqipëria me shtetet e rajonit kanë firmosur një marrëveshje me Britaninë për të bashkëpunuar në luftën ndaj pastrimit të parave dhe korrupsionit. Marrëveshja është nënshkruar mes ministrave të Brendshëm dhe është angazhuar vetë Tereza Mei, e cila ishte ende në detyrë kur u mbajt samiti. Britanikët e shohin me shqetësim krimin që importohet nga Shqipëria, Bosnja, Serbia apo Maqedonia e Veriut në Londër dhe të gjithë janë bërë bashkë për të luftuar këtë fenomen. Marrëveshja është projekt i hartuar nga Britania, e cila do japë dhe 80 milionë paund për vendet e rajonit, me qëllim që projekti të zbatohet dhe bashkë të goditet korrupsioni dhe pastrimi i parave.
Londra po përdoret kohët e fundit si vend për pastrimin e parave nga shumë kriminelë shqiptarë. Po ashtu politikanët dërgojnë atje shuma të mëdha parash, të cilat pastrohen. Kjo gjë po i shqetëson shumë britanikët, të cilët kanë hartuar një projekt që të bashkëpunohet me vendin tonë, në mënyrë që të mos ketë më para kriminale në Londër dhe të ndëshkohen të korruptuarit. Pra pushtetari në fjalë me 80 milionë euro mund të jetë i pari që do të fundoset. Pak kohë më parë Drejtoria e Pastrimit të Parave nisi verifikimet në banka për këdo që bënte transferta jashtë. Por angazhimi i drejtpërdrejtë i britanikëve duket se e tregon qartë se lufta ndaj të korruptuarve do të forcohet. Ekspertë të ndryshëm kanë deklaruar se sado që paratë janë fshehur në vende të ndryshme dhe janë përdorur mënyra të sofistikuara, autoritetet nëse duan mund t’i zbulojnë ato. Mbetet të shihet se si do zbatohet kjo marrëveshje, por sinjalet po jepen qartë se paratë kriminale do gjenden. /Kliti Topalli
