Politikanë shqiptarë të lidhur me Serbinë dhe Rusinë po tentojnë të krijojnë destabilitet në vend. Opozita ka paralajmëruar një protestë në datën 16 shkurt, por për avokatin Spartak Ngjela opozitarët, të ndikuar nga rusët dhe serbët, kërkojnë trazira.
Dy ditë më parë Policia e Shtetit u shpreh e shqetësuar për protestën e fundjavës sepse kishte konstatuar se disa persona me precedentë penalë po planifikojnë të aplikojnë skenarë dhune.
Edhe Ngjela, nuk i përjashton trazirat. Madje sipas tij, një gjë e tillë mund të arrihet për shkak të lidhjeve të politikanëve tanë me rusët dhe serbët.
Këto lidhje Ngjela i sheh tek thirrjet për destabilizim të ish-kryeministrit Sali Berisha. Sipas tij, edhe tensionet në Kosovë nxiten nga rusët.
“Presioni ruso-serb kërkon destabilizim në të dy shtetet shqiptarë. Kurse korrupsioni i lartë politik në Tiranë dhe në Prishtinë është hedhur i gjithë me të.
Presioni ruso-serb është rritur më shumë edhe në Shqipëri, por edhe në Kosovë. Sot ky presion po mundohet që të influencojë me të gjitha mjetet duke u mbështetur te korrupsioni i të dy shteteve shqiptarë.
Në Kosovë presioni ruso-serb turbullon me ndërrim territoresh me anë të presidentit Thaçi dhe grupit të tij, kurse në Shqipëri me protestat e Saliut, ku kërkohet një destabilizim tërësor”, deklaroi Ngjela.
Sipas tij, përmes protestave të dhunshme, të korruptuarit shqiptarë kërkojnë të shpëtojnë nga ndëshkimi i reformës në drejtësi.
“Në fakt kjo është e vetmja rrugë që korrupsioni i lartë politik në Tiranë mendon të shpëtojë nga goditja penale dhe nga aksionet e mëdha që priten të fillojnë me SPAK.
Gjithçka, nga korrupsioni i liderëve të Partisë Demokratike, po trajtohet në Shqipëri “si shpëtim nga Rama”, kurse në Kosovë si “një njohje tërësore e Kosovës nga vetë Serbia”.
Rama e ka shpresën te destabilizimi që mund të sjellin në Shqipëri të korruptuarit e opozitës me protestën e datës 16 shkurt.
Në këtë kohë korrupsioni i opozitës në Tiranë nuk po vuan nga Rama, por nga shtrëngimi i lakut të antikorrupsionit”, tha avokati dje.
Spartak Ngjela deklaroi prerazi se pavarësisht tentativave, stabiliteti në vend nuk mund të prishet. Duke qenë se ish-kryeministri Berisha është një ndër personazhet që bën më së shumti thirrje për protesta të dhunshme, avokati u shpreh se ai do të vihet nën presionin e Shteteve të Bashkuara të Amerikës për të ndalur skenarët e tij të dhunës.
Spartak Ngjela theksoi se në 16 shkurt opozita nuk do të ketë mbështetës, ndërsa paralajmëroi se në këtë datë do t’i jepet një goditje korrupsionit shqiptar. Sipas tij, askush nuk shpëton dot nga ndëshkimi i SPAK.
“Asgjë nuk mund të ndodhë me stabilitetin e të dy vendeve as nga Berisha e as nga Thaçi. Po politika amerikane, a do t’i kërcënohet Berishës njëlloj siç iu kërcënua për çadrën në vitin 2017?
Sigurisht që po. Dhe keni për të parë presionin amerikan, dhe sesi vetë hordhitë e Saliut do të humbasin nën presionin e frikës së brendshme që do të konstatoni te vetë Saliu.
Shqiptarët nuk mund ta përkrahin korrupsionin e lartë politik as në Shqipëri dhe as në Kosovë, dhe këto ditë ata do ta shohin vetë që politika amerikane nuk ka ndryshuar asnjë grimë në lidhje me përkrahjen e çështjes shqiptare në Ballkanin Perëndimor.
Në të vërtetë në datën 16 shkurt keni për të parë realisht falimentimin tërësor të korrupsionit shqiptar të të dy krahëve të politikës së lartë në Shqipëri”, tha Spartak Ngjela.