Nga nesër, të gjithë ata që do të kalojnë në aksin Thumanë-Kashar do të duhet të paguajnë.
Kompania koncesionare “Gener 2” e biznesmenit afër Berishës, Bashkim Ulaj, që ka ndërtuar dhe mirëmban këtë rrugë, pjesë e korridorit Blu, njoftoi më 13 dhjetor 2024, fillimin e regjimit të pagesës nga data 4 janar, siç ishte parashikuar në fillesat e saj.
Kompania koncesionare “Gener 2’, e ndërtimit dhe mirëmbajtjes së këtij segmenti prej 21 kilometrash, ka përcaktuar si tarifë bazë vlerën e 2.52 euro me TVSH. Por kur ende mungojnë pak orë nga nisja e pagesës së rrugës Kompania nuk ka publikuar ende tarifat e detajuara për cdo lloj mjeti që do të kalojë. Për më tepër kjo tarifë në euro, sipas ‘Gener 2’ do të ndryshojë cdo vit në varësi të luhatjeve të kursit të këmbimit lekë/euro. Kontrata parashikon gjithashtu rrumbullakosje të çmimit kur është me presje dhjetore.
Nga ana tjetër teksa monedha vendase është leku, pagesa në lekë do të bëhet në bazë të një kursi që do të përcaktohet në kontratë, i afërt me kursin e tregut.
Rruga Thumanë-Kashar u hap për qarkullim në 30 qershor 2024 dhe është dhënë me koncesion kompanisë Gener 2 për 35 vite dhe me një kosto 271 milionë euro.
Segmenti ka një gjatësi prej 21 kilometrash dhe është autostrada e parë e Kategorisë A. që nënkupton jo vetëm standarte europiane të ndërtimit të rrugës, por edhe një limit shpejtësie tjetër nga ai që kanë akset e tjera rrugore të vendit. Ky aks rrugor është aksi i parë ku qarkullohet me një limit shpejtësie deri në 130 kilometra në orë.
Ndërkohë me firmën e zv/kryeministres Balluku është shpërblyer Bashkim Ulaj, me dy projekte të mëdha në harkun e 12 ditëve.
Projekti i parë është ai për ndërtimin e një TEC-i në Roskovec. Në mbledhjen e 18 dhjetorit 2024, qeveria ka miratuar ndërtimin e termocentralit me kapacitet të instaluar prej 170 MË. Ky projekt do të realizohet nga shoqëria greko-shqiptare “Fier Thermoelectric” sh.a, e cila aksionere ka kompaninë greke “DEPA COMMERCIAL S.A”, 35%, kompaninë tjetër greke “GEK TERNA Holdings”, 35%, ndërkohë që “GENER 2” zotëron 30% të aksioneve. Por sipas zërave, në fakt kompanitë e tjera janë sa për sy e faqe, pasi fijet i lëviz Bashkim Ulaj, i cili ka dy vite që lobon për këtë projekt.
Pak ditë më parë banorët e fshatrave Suk-1, Suk-2, Arapaj, Strum, Velmish, Drenovicë, Samaticë, Rrëzë, Gorican, Kutalli etj., dolën në protestë, duke kërkuar bllokimin e projektit.
Një ditë nga mbyllja e 2024, (30 dhjetor 2024) qeveria miratoi kontratën koncesionare 44,6 milionë euro pa TVSH për projektimin dhe ndërtimin e segmentit rrugor Milot-Thumanë, 13,5 km i gjatë, pjesë e korridorit blu. Qeveria miratoi kontratën e koncesionit me bashkimin e operatorëve ekonomikë “Gener 2”, “Illyrian Consulting Engineers”, dhe “I.D.K – Konstruksion”. Koncesioni (PPP) do të kushtojë 44,6 milionë euro pa TVSH. Kohëzgjatja e kontratës koncesionare/PPP do të jetë 35 vjet nga hyrja në fuqi e saj. Gjurma e kësaj rruge fillon pranë nyjës së Milotit dhe përfundon pranë rrethrrotullimit të Thumanës
Jo vetëm kaq po në këtë mbledhje të Këshillit të Ministrave biznesmeni Bashkim Ulaj, botues dhe pronar i stacionit televiziv A2 së bashku me dy vëllezërit e tij Astrit dhe Ahmet Ulaj morën statusin e veçantë “investitor në strukturë akomoduese me 5 yje, status special” për ndërtimin e resortit turistik Blue -Borgo” në bregdetin e Velipojës.