E tmerruar nga djegia e mandatit dhe humbja e rrogës si deputete, Kryemadhi ka vendosur të injorojë Bashën
Protesta e studentëve ka nxjerrë në pah krisjen më të madhe të opozitës së bashkuar, PD dhe LSI. Monika Kryemadhi i ka bërë ‘naftën’ Lulzim Bashës, duke i kthyer kurrizin dhe përbuzur totalisht urdhrin e tij për bojkotimin e Kuvendit.
Kryemadhi ka vendosur të rikthehet në Parlament me pretekstin qesharak për të ‘shpëtuar’ studentët, por në fakt halli i saj është tjetër kund. Kryetarja e LSI dhe deputetët e kësaj force politike do të rikthehen në Parlament për të shpëtuar mandatet e tyre, pasi rrezikojnë t’iu digjen, për shkak të mos marrjes pjesë në seancat plenare prej shumë muajsh.
Protestat masive të studentëve prej më shumë se një jave nuk janë aspak ‘karremi’ që do të rikthejnë Monën dhe vartësit e saj në Kuvend, por gjithçka lidhet me mandatet e tyre. E tmerruar nga djegia e mandatit dhe humbja e rrogës si deputete, Kryemadhi ka vendosur të injorojë dhe aleatin e saj kryesor, Bashën, duke shënuar kështu krisjen e madhe opozitare në këtë fundvit.
Ishin dy deputetë të LSI, që me urdhrin e Kryemadhit, dorëzuan sot në Kuvend dy amendamentet e partisë së tyre, duke thënë se këta do të zgjidhin përfundimisht hallet e studentëve. Ndërsa nga ana e saj, ishte vetë Kryemadhi që dha sinjalet e rikthimin në Kuvend, duke i bërë thirrje Gramoz Ruçit të kalojë me urgjencë në seancën e nesërme amendamentet e LSI.
“Sot ne i propozojmë Kuvendit dy amendamnete që zgjidhin përfundimisht 8 kërkesat minimale dhe kostoja e tyre për Edi Ramën është inekzistente. Konkretisht propozojmë., amendament në ligjin për buxhetin 2019. Ligji për buxhetin të bëhen këto shtesa dhe ndryshime, në tabelën 1 të ndryshohet totali i zërave për arsimin. Të bëhet nga 7 miliardë e 500 mln në 14 miliardë e 909 milionë lekë. Vetëm 1% e GDP-së. këto para? Shumë e thjeshtë, buxheti është 46% e GDP-së kalon për të paguar koncesionarët. Le t’ja lejë 45% koncesioneve dhe 1% t’jua japë studentëve.totali i shpenzimeve për fondet shkencore të bëhet nga 620 mln lekë në 1 miliardë.
Neni dy, të krijohet fondi i Emergjencës për Arsimin me vlerë 5 miliardë lekë. Këto para të përdoren për infrastrukturë. Paratë? Të anulohet tenderi i Unazës së Re. Këto propozime janë e vetmja mundësi për të zgjidhur kërkesat minimale të studentëve shqiptare. I bëjmë thirrje Kuvendit t’i kalojë me urgjencë në seancën e nesërme, pasi është e vetmja mënyrë të shlyejmë mëkatin e politikës, për të dalë nga ky ngërç i tmerrshëm, që të hapet rruga për krijimin e një strategjie afatgjatë”, tha Kryemadhi, duke dhënë kështu mesazhin se nesër do të jetë në seancë plenare.