John Leonardo është vëzhgues i misionit ndërkombëtar të monitorimit, shkurt ONM.
Leonardo i cili ka ardhur në Shqipëri në 2017, është njëri nga tetë vëzguesit ndërkombëtarë që po ndjek hap pas hapi procesin e Vettingut.
Ai është ekspert nga Shtetet e Bashkuara të Amerikës dhe më herët ka shërbyer në vendin e tij edhe si prokuror i Arizonës.
44-vjeçarja me inicialet A. Leskaj i ka treguar policisë se në rrugën “Pjetër Budi”, shërbente si mirëmbajtjëse e qenit të shtetasit Xhon Leonardo, por kafsha është zhdukur.
“Shkova në banesë – pohon gruaja – dhe e gjeta derën të hapur, kërkova gjithandej nëpër shtëpi por qeni nuk ishte në shtëpi. Kërkova në lagje, por nuk gjeta asnjë gjurmë të tij”.
Në këto kushte, pasi ka marrë denoncimin, policia thotë se po punohet për gjetjen e qenit, i cili u ka shtuar një hall më shumë uniformave blu.
Sakaq policia nuk mjaftohet me kërkimet, ka referuar gjithashtu materialet në Prokurori, e cila do të vlerësojë se çdo të bëjë më tej.
Derisa letrat e kallëzimit të bëjnë xhiro në Tiranë, le të shpesojmë se edhe eksperti i ONM-së do jetë shqiptarizuar sadopak dhe se do ta gjejë qenin e tij në mënyrë vendshe, duke pyetur e duke kërkuar. Ose le të shpresojmë se qeni do të kthehet në shtëpi, që edhe Leonardo, të jetë i qetë gjatë seancave të Vettingut /Si.