Na u ngrit burri i botës që në pikën e mëngjesit dhe na lëshoi një thes me përralla të përsëritura. Tha e çfarë nuk tha vetëm se në cilin nen të Kushtetutës e kishte mbështetur atë ç’dekretim nuk e tha dot. Shoshi e shoshi, po nuk gatoi. Na foli për disa kriza, që qenkan në kokën e tij, se pushteti po punon normalisht dhe ndershmërisht.
Ka kohë që na flet e përsërit krizën kushtetuese, se u qëruan nga drejtësia hajdutët dhe batakçinjtë e drejtësisë, që i falën dënimin edhe Presidentit, edhe krerëve të opozitës për krimet që i kanë shkaktuar këtij vendi. Kush tha që vendi na qenka në krizë, kur në krizë është opozita, se shpif turli kaseta me Babale për të mbuluar krimet e saj. Të mbrosh opozitën, siç bëri Presidenti, do të thotë të mbrosh krimin.
Presidenti aludoi, se zgjedhjet nuk janë normale, kur nuk është rregjistruar opozita. Po nuk na tha, se kush e pengoi këtë opozitë të merrte pjesë në zgjedhje? Zgjedhjet janë garë, ku hyn ai që e mendon se do të fitojë, të tjerët janë tifoza, siç mbeti dhe kjo farë opozite. Presidenti na përmendi pabarazinë në zgjedhje, kur askush nuk e ka penguar opozitën të hyjë e të bëhet e barabartë me të tjerët. Kushtet e vëna nga opozita nuk kishin asnjë bazë ligjore. Është njësoj si t’i teket një force tjetër politike e të kërkojë largimin e ambasadës amerikane nga Shqipëria.
Një gjë na e tha të vërtetë, se na i paska ndjekur të gjitha protestat e opozitës, sepse në këtë të fundit e urdhëroi të largoheshin nga godina e Kuvendit. Po përse i ndoqi ato? Sepse prej tyre kishte shpresë se do ta përmbysnin qeverinë e t’i shpëtonte burgut. Por na bëri opozitarin kur takimet e Ramës për zgjedhjet na i quajti antimitingje!
Pozita bënte mitingje në zbatim të dekretit të Presidentit që kishte caktuar 30-qershorin ditë zgjedhjeje, po Presidenti çfarë priti deri tani, kur kriza, sipas tij ishte prezente prej dy vjetësh në Shqipëri? Çfarë antimitingu na qenka ky? Në këtë politikën tonë ndodhin çudira. Presidenti bëhet palë me opozitën dhe argumenton pa baza, se kjo farë opozite nuk qenka regjistruar në Komisionin Qendror të Zgjedhjeve, prandaj duhen anuluar! Po çfarë të drejtash i ishin mohuar opozitës?
Ajo nuk ka paraqitur asnjë dokument ligjor nga organet e drejtësisë që të vërtetojnë tjetërsimin e votave, por bazohem në përrallat e shtypit, që vetë i shkruajnë e vetë i quajnë argumente! Asnjë strukturë ndërkombëtare nuk tha se qeveria dhe Kuvendi janë ilegjitime me përjashtim të ndonjë individi të paguar, që nuk ngre asnjë peshë. As opozita nuk ka paraqitur një fakt të vetëm që zgjedhjet janë blerë e vjedhur. Janë mbërthyer pas ca kasetave, që nuk janë hetuar ende. Por ato quhen të mirëqena kur të kenë një vendim gjyqësor.
Po përse bëhet kjo zhurmë e madhe pa asnjë vlerë? Presidenti dhe krerët e opozitës na qenkan keq, sepse SPAK po ua afron çdo ditë lakun. Dhe hedhin çdo ditë parulla për ta djegur Shqipërinë. Drutë i ka përgatitur opozita, benzinën do t’ja hedhë Presidenti, kurse shkrepësen ja kanë lënë për ta ndezur zonjëzës Moni! Pastaj heronj të krimit do të dalin Presidenti, Lulushi, Lulushka e kompani. Në prokurori kanë vajtur shumë denoncime e kallëzime penale për shkatërrimet që ka bërë opozita, të cilët duhen shpëtuar, ndryshe gjysma e partisë eleminohet.
Me gënjeshtra as mbahet, as merret pushteti. U bënë tetë protesta, ku do të rrëzohej Rama, po në asnjë nuk ndodhi rrëzimi i Ramës. Pra kemi të drejtë të themi, se opozita u shtoi edhe tetë gënjeshtra atyre që kishte prodhuar deri tani. Në protestën e fundit pamë gënjeshtrën me të madhe,kur dëgjuam, se ajo na qenkësh me e madhja që ishte mbajtur ndonjëherë. Po, a e patë si ishin bërë koqe-koqe nëpër bulevard që të dukeshin shumë?
Presidenti na e justifikoi shtyrjen e zgjedhjeve me pretendimin, që forcat politike do të kenë kohë për të reflektuar! Këtë nuk mund ta thoshte asnjë bari në majën e malit, që nuk ka asnjë komunikim me televizionet. Si është e mundur që të merren vesh për dy-tre muaj kur janë thikë më thikë e nuk u morën vesh për kaq vjet?
Ai na deklaroi, se na paskësh bërë të pamundurën për t’i bashkuar, por nuk na i paskësh arritur. Si ta marrim këtë, si paaftësi, apo si palë me opozitën. Presidenti pranoi ca bishtra të opozitës, ku gatoi e pranoi shtyrjen e zgjedhjeve për gjashtë muaj. Mirë, që forcat e tjera nuk i bashkoi dot, po një nga një nuk mund t’i thërriste? Po të kishte bërë këtë dhe ato të mos pranonin, përgjegjësia binte mbi ato. Mirëpo ti i re shkurt, se puna nuk pret. SPAK po qaset me shpejtësi dhe veprimet mafioze duhen shpejtuar.
Na lëshoi një thes me përralla, që i quante kushtetuese, ku nuk kishte asgjë kushtetuese, sepse kur vendose datën e zgjedhjeve more dakordësinë e partive, kurse këtë radhë nuk i begenise dhe bëre bllofin më të madh që ka bërë ndonjë president deri tani. Po sikur në afatin që do të caktohet nuk do të marrë pjesë pala tjetër, çfarë do të bëni? Do të ç’dekretoni sërish? Mos u tremb, ore burri i dheut, se burgu për burrat është, pavarësisht se do të përfshijë shumë nga ju. Ligjet për atë punë i keni dekretuar vetë, tani zbatojini.
Nga Guro SOTIRI