Pas fitores së Trumpit, brenda demokratëve ka një entuziasëm të lartë për fitoren e tyre në zgjedhje.
Por Mulit nuk i ka pëlqyer shumë mënyra se si disa individë brenda partisë po përpiqen të hiqen si njerëz me merita, duke pretenduar se kanë qenë mbështetës të Trumpit.
Duke folur me Lelon për këtë çështje, i dha disa porosi:
– Së pari, duhet ta bëjmë të qartë se i vetmi që duhet të përfitojë nga fitorja e Trumpit është vetëm ai burri, jo të tjerët.
Për të vënë në vend padrejtësinë, Trump duhet të dërgojë Grenellin tek Syri, dhe së bashku me Çim Pekën të shkojnë të nxjerrin Doktorin nga shtëpia dhe t’i thonë Dumanit “preke po deshe”.
Po nuk e bëri këtë, nuk fitojmë gjë.
– Së dyti, duhet t’i frenojmë këta që kanë dalë në foto me Trumpin.
Ky Belua po përpiqet të dalë si njeriu që i dha votat në Michigan.
Mirë që Trumpi fitoi me 300 mijë vota, se po të kishte fituar ngushtë, do thoshte “doli me votat e mia”.
Duhet ta këshillosh mos ta hedhë më atë foto në media.
Pa bërë foto me atë burrë, s’ka më foto të tjera në media me Trumpin.
E bëmë njëherë atë gabim me Lulin dhe na e futi.
– Së treti, duhet të përdorim fitoren e Trumpit për të mobilizuar demokratët duke thënë që edhe 80-vjeçarët mund të fitojnë, dhe ata që i dënon drejtësia mund të fitojnë, dhe ata që kanë probleme me botën mund të fitojnë.
Është e vetmja pikë ku Trumpi ndihmon Doktorin, sepse ai ka probleme me drejtësinë lidhur me korrupsionin dhe liderët e tjerë të botës.
Këtu duhet të përqendrohemi.
– Dakord jam, tha Lelo.
Madje të shtojmë që ashtu si Doktori, Trumpi nuk mban përgjegjësi për atë që bëjnë fëmijët, të cilët janë shitur tek Edi Rama.
– Dakord, shtoje, tha Muli.