Muli po diskutonte sot me Lelon se si mund të goditet ky premtimi i Edi Ramës për rritje të rrogave.
-Na ka kap pak keq, tha Lelo, se ne kishim filluar fushatën që do t’i çonin rrogat 1,5 milion lekë të vjetra.
Tani e kemi pak problem që të kundërshtojmë rritjen e rrogave që thotë ai.
Na ka ngelur të themi vetëm që ai gënjen.
-Prit, tha Muli. Nuk duhet të tërhiqemi.
Ne duhet t’i bashkojmë premtimet e Doktorit me premtimet e kandidatëve dhe të nxjerrim një shumatore.
Për shembull, rrogat do t’i bëjmë 1500 euro, transporti urban falas, që shton dhe një 100 euro në muaj, bëhet 1600, arsimi falas, që shton dhe një 200 euro në muaj, bëjnë 1800.
Duhet të gjejmë dhe ndonjë bonus për 200 euro dhe ta bëjmë 2000.
-Ja të flas me Belon, se ai ka ide për këto gjërat falas, tha Lelo.
Kështu mund ta maskojmë si paketë.
-Kjo ka shumë rëndësi, tha Muli.
Për shembull t’u themi shqiptarëve që 200 euro në muaj më shumë do t’i keni nga ulja e çmimit të rrugëve që do bëjmë.
Ja ku shkuan 2000. Mos të llogarisim pastaj jo inceneratorët jo, tenderët e tjerë të AKSHit etj.
-Dakord, tha Lelo. Por duhet të gjejmë një fabulë që të duket e besueshme, që të duket që kemi një plan.
Se dhe shoku Enver i kishte të gjitha falas këto që po themi, dhe kur i mblidhje bashkë me rrogën dukej se merrje më shumë se në Gjermani, por nuk ja quanin për nder që ishin pa taksa.
-Po atëherë nuk e dinim çfarë ishin taksat, tha Muli.
Tani që e provuam ja dimë kimetin.