Doktori sot zbuloi një tjetër “komplot” të madh, një nip i gruas së Dumanit punonte në Bashkinë e Tiranës.
Pas këtij zbulimi, thirri Mulin dhe i dha një detyrë të ngutshme: të gjente emrin e nipit dhe çfarë bënte ai në Bashki.
Muli, i hutuar nga urdhri i menjëhershëm, mbeti pa e ditur se kujt t’i drejtohej për ndihmë.
Ishte detyrë delikate: duhej të zbulonte çfarë pozicioni mbante ky nip, lidhjet e tij me lali Erin dhe, mbi të gjitha, si ndikonin vendimet e SPAK përmes tij.
Sipas Doktorit, ky nip misterioz ishte një “ndërmjetës i fshehtë” mes lali Erit dhe SPAK.
I paqartë dhe i shqetësuar, Muli thirri në ndihmë shefin e kabinetit të Doktorit, Akil Krajën.
-Dëgjo, Akil, nisi Muli serioz.
Doktori ka zbuluar një komplot të rrezikshëm.
-Çfarë komploti, e pyeti Akili?
-E njeh Dumanin ti? Të SPAK-ut?
-Po, e njoh.
-Ai ka një grua.
-E di.
-Gruaja e tij ka një nip.
-Këtë nuk e dija, tha Akili, duke ngritur vetullat.
-Prandaj duhet ta zbulojmë, çfarë nipi është?
Djali i vëllait, apo i motrës? Ose ndonjë kushëri?
Dhe si e ka emrin.
Por më e rëndësishmja, pse paguhet nga Bashkia?
Akili po e dëgjonte me vëmendje.
-Po çfarë rëndësie ka kjo, Muli, pyeti Akili?
-Si nuk ka rëndësi, tha Muli, duke e ngritur zërin?
Po ta faktojmë këtë, është një skandal i madh për paanshmërinë e SPAK.
E kupton ti? Nipi i gruas së një prokurori të SPAK të punojë në Bashki?
Akili u pre në fytyrë. U mendua pak dhe tha:
-Muli, unë kam një problem këtu.
Unë jam djali i xhaxhait të Ben Krajës, ish- kryetarit të SPAK, prokurorit te Doktorit.
Unë jam shumë më afër sesa ky nipi i Dumanit.
Muli heshti për një moment.
-Jo, jo, mos u mërzit! Për ty nuk quhet.
Doktori nuk i korrupton njerëzit dhe nuk i keqpërdor.
Nuk është si lali Eri! Ti je i pastër.
Akili mori frymë i lehtësuar.