Ministri për Evropën dhe Punët e Jashtme, Igli Hasani ka dhënë një intervistë ekskluzive sonte për “Opinion” ku flet për karrierën e tij diplomatike dhe ushtrimin e detyrës aktuale. Vitin e shkuar, Hasani ishte kandidati i vetëm zyrtar për Sekretar të Përgjithshëm në OSBE. Por si u vendos që vendi ynë të marrë pjesë në këtë garë?
“Organizata për Sigurinë dhe Bashkëpunimin në Europë pati një moment të vështirë në lidershipin e vet, pamundësinë për vazhdimin e mandatit të atyre që po e drejtonin. Kryesia malteze e OSBE-së vendosi hapjen e një gare, garë e cila u hap në muajin Qershor të këtij viti, në mënyrë që të kishte boshllëk në lidership. Në asnjë moment s’e kisha menduar që do t’i rikthehesha organizatës në asnjë lloj formati, kam punuar para se të merrja detyrën dhe kur m’u bë ftesa për t’ju bashkuar qeverisë Rama, jo vetëm që nuk pata asnjë hezitim, por mendoj se kam qenë thelbësisht i fokusuar në punën që po bëhej. Por një seri kolegësh të huaj menduan dhe ishin koordinuar që të kishte një kandidaturë nga Shqipëria dhe kjo kandidaturë të isha unë.
Jo vetëm për faktin se Shqipëria ka një perceptim shumë të mirë në raport me atë që ka bërë në fushën e diplomacisë vitet e fundit, por edhe sepse në vitin 2020 ne kryesuam denjësisht OSBE-në. Fakti që unë isha pjesë e atij mekanizmi, sekretariati për periudhën para se të bëhesha pjesë e qeverisë. Ka qenë shumë e vështirë që në radhë të parë të bindja veten, pasi i binte që unë të filloja që vetëm 6,7 muaj pasi isha kthyer, të mendoja të lija Shqipërinë. Por, kryeministri ishte i bindur që kjo ishte një mundësi e mirë për të gjithë ne, për vendin, rajonin…”, deklaroi ministri i Jashtëm.
E pavarësisht se mori 39 vota përballë “rivalëve” të tjerë, Hasani shpjegon arsyen pse tërhoq nga gara e rëndësishme.
“OSBE nuk e ka parimin e votës, por të konsensusit. Pra që vendimet të jenë të miratuara, duhet që të 57 vendet anëtare t’i pranojnë. Unë mora 39 preferenca, rivali turk kishte 9 preferenca dhe 9 vende ishin abstenim, për të shkuar në të dy drejtimet. Është një përpjekje shumë e mirë dhe ambicioze që diplomacia shqiptare ka bërë ndër vite për të pasur këtë nivel përfaqësimi që ne kemi. Duke nisur nga Kryesia e OSBE-së në 2020-ën, angazhimi në Këshillin e Sigurimit në periudhën 2022-2023, por edhe në shumë nisma që e kanë ngritur reputacionin e vendit.
Sepse kuptuam në radhë të parë që dy prej partnerëve tanë strategjikë dëshironin dhe këmbëngulnin që t’i merrnin ato pozicione. Turqia dhe Greqia. Kuptuam se me gjithë mbështetjen masive, kishte edhe ndonjë vend që priste momentin e duhur për të minuar të gjithë paketën mbështetëse dhe për ta shndërruar këtë proces kaq gjithëpërfshirës në një proces refraktar i cili do çonte në bllokimin e punës së organizatës dhe një shkatërrim të gjithë asaj pune”, sqaroi Hasani.
Hasani e thotë me bindje: Shqipëria do jetë anëtare e BE-së në vitin 2030!
Igli Hasani mori besimin e kryeministrit të vendit Edi Rama për të drejtuar Ministrinë e Jashtme në Gusht 2023. Por karriera e tij diplomatike është e gjatë dhe me shumë suksese. Sonte në një intervistë për “Opinion”, ai flet për punën e tij ndër vite dhe po ashtu tregon ‘sfidat’ si ministër.
“Jam nëpunës civil që prej vitit 2001, kam punuar në Ministrinë e Mbrojtjes që nga 2001-i deri në fillim të vitit 2018. Më pas jam emëruar ambassador i Shqipërisë në Organizatën Ndërkombëtare në Vienë, mbuloja OSBE-në dhe zyrat e OKB-së në Austri. Më pas u pranua Shqipëria që të drejtonte OSBE-në, fati dhe angazhimi im ka qenë se unë kam drejtuar ekipin e Shqipërisë në atë vit të vështirë. Këtu më është bërë oferta e parë nga OSBE-ja për të punuar në Sekretariat, ku kam punuar nga 2021-i deri në Gushtin e vitit të kaluar që mora detyrën e ministrit të Jashtme. Ky vit është shumë i rëndësishëm për hapjen e negociatave me BE-në. Duam të hapim edhe dy grup-kapituj për vitin 2025 dhe njëkohësisht të plotësojmë të gjitha angazhimet që kemi. 2024-a ka pasur angazhime të mëdha për atë që po bën Shqipëria në arenën ndërkombëtare, kemi organizuar dy samite si dhe kemi angazhime konkrete që janë pjesë e përditshme e punës tonë dhe aspak pjesë e retorikës politike”, tha ai.
Teksa e cilësoi prioritet procesin e negociatave me BE-në, Hasani u shpreh me bindje se Shqipëria do jetë pjesë zyrtare e familjes europiane në vitin 2030.
“Është mëse e qartë që Shqipëria do jetë anëtare e Bashkimit Evropian në 2030-ën. Absolutisht po! Me përfundimin e gjithë negociatës teknike, do vijojë angazhimi politik për të ratifikuar të gjithë këtë marrëdhënie në vendet anëtare të BE-së. Është konkrete, e qartë, e detajuar dhe e mirëpranuar si nga ne edhe nga BE”, përfundoi ministri.