Kryemadhi ka mbledhur pasditen e së martës gratë e Lëvizjes Socialiste për Integrim.
Duke folur para të pranishmeve, Kryemadhi tha që nuk duhet të lejohen më padrejtësi në kurriz të fëmijëve të shqiptarëve.
“Në fund të ditës, me vështirësitë që ka jeta, ne i kemi përballuar ato. Vetëm angazhimi ynë do t’u japë zemër protestave” – tha kreu i LSI.
Ajo u shpreh se shumica e komisionereve të partisë që drejton do të jenë gra.
“Gratë e LSI janë elementi më luftarak që kemi, sikurse edhe motivimi i të gjithë iniciativës tonë” – tha Monika Kryemadhi.
Ajo pati edhe një kërcënim për Edi Ramën.
“Bën mirë që atje ku nuk e njeh ligjin, të mos çuditet kur të përdorim Kanunin ndaj tij” – u shpreh kryetarja e LSI.
Kryemadhi tha se sa më shumë Rama të zgjasë vuajtjet e shqiptarëve, aq më shumë shqiptarët do ta ndëshkojnë atë.
“Çdo ditë që ikën është dhimbje për të dhe më shumë se për Edi Ramën është dhimbje për shqiptarët.
Ne do punojmë për të dalë të gjitha në 25 maj siç jemi me gratë tona, vajzat tona, komshijet tona për t’i dhënë fytyrën e nënave.
Janë nënat ata që do ta ndryshojnë këtë realitet të hidhur.
Prandaj, le ta marrin fatin në dorë dhe të luftojmë për të ardhmen e fëmijëve tanë.
Jam e bindur se angazhimi juaj si strukturë e LGI-së do të shtrihet në çdo protestë“, tha Kryemadhi.