Gazetari Mentor Kikia ka ironizuar përmes një postimi në rrjetet sociale, zhurmën që po krijohet në vendin tonë pas të ftohtit acar që ka mbërritur.
Teksa kujton fëmijërinë e tij që në mes të ftohtit i duhej të shkonte në shkollën që e kishte larg shtëpisë, Kikia thekson se qeveria e ka për detyrë që të marrë masa dhe jo të përhap panik.
Postimi i plotë:
Si të përballojmë gjendjen e jashtëzakonshme nga dimri polar…
U ngrita në mëngjes dhe, sipas porosive të qeverisë dhe cupave të motit, u vesha mirë; dy palë corape, dy palë tuta, tri bluza e dy pulovra, një shall, një kapuc… Mora thikën e madhe të mishit, një mburojë… apo jo, këto të fundit nuk i mora thjeshtë i mendova. Le të vijë i ftohti polar tani po ia mbajti. I thonë -7 në mes të natës, nuk është shaka.
T’ëmën e – kur thonë korcarët. Po unë në këtë temperaturë shkoja cdo ditë në shkollë. Atje në fshatin tim në Elbasan, kishim një përrua plot me uje(binte shi atëkohë jo si sot). Në mëngjes kur gdhiheshin, përroi ishtë tërësisht i ngrirë. Ne, ose kalonim mbi akull, ose nënat tona thyenin akullin e futnin këmbët të na kalonin ne fëmijëve matanë, që të mos lageshin. Kur shkonim në shkollë ndizmin sobën me dru, dhe ndërsa mësuesja shpjegonte mësimin ne ngriheshim më radhë për tu ngrohur pranë saj.
Pale c’bënim tek liqeni i vogël i ngrirë. Mbi akull loznim me karroca me kuzhinieta. Nga catitë vareshin kallamë akulli dhe ne i thyenim të loznim shpatash. Dhe nuk ishin dy ditë të tilla, por plot dy muaj.
Pra dimrit polar ia kishim gjetur anën edhe atë kohë, kur gjithë gjithë kishim dy triko. Thërrisnim në ndihmë edhe trahananë e ngrohte në mëngjes, që të na ngrohte barkun gjatë rrugës dhe niseshim për në shkollë.
Marrja e masave nga strukturat qeverisëse është një detyrë dhe punë normale e tyre. Ndaj shpallja e një lloj paniku nga media dhe nje vendim i Ministrisë së Arsimit për mbylljen e shkollave, më duken fare pa vend. Ky duhej të ishte janari normal, por meqë klima ka ndryshuar në mënyrë drastike, ne jemi gati të shpallin gjendjen e jashtëzakonshme pse do të zbresin temperaturat në Tiranë në -7.
Ndërsa ajo që nuk përballoj dot tani janë lajmet me elektricistë që do të rregullojnë telat në këtë të “ftohtë ekstrem”, mjekë që do të ecin në dëborë të shkojnë tek pacienët, policët që janë në shërbim në rrugë, kufitarët që ruajnë kufirin… apo jo, kufitarë s’ka më.