Ministri i Brendshëm Taulant Balla, deklaron se javën e ardhshme do të zhvillohet në Tiranë një takim i ministrave të brendshëm të vendeve pjesëmarrëse në Procesin e Berlinit, takim i cili paraprin Samitin e Tiranës.
Përmes një postimi në rrjetet sociale ministri Balla deklaron se gjatë takimit të zhvilluar dje me Ambasadorin Luigi Soreca të Ngarkuarin me Punë në Tiranë, ka nënvizuar se kryefjalë e diskutimeve ka qenë bashkëpunimi me BE në çështje që lidhen me sigurinë, migracionin, apo luftën kundër krimit të organizuar.“Javën e ardhshme mirëpresim në Tiranë ministrat e brendshëm të vendeve pjesëmarrëse në Procesin e Berlinit.
Takimi i Ministrave të Brendshëm paraprin Samitin e Tiranës dhe synon thellimin e bashkëpunimit, integrimit rajonal dhe përshpejtimin integrimit të vendeve të Ballkanit Perëndimor drejt Bashkimit Europian. Me Ambasadorin Luigi Soreca, të Ngarkuarin me Punë ad interim, i sapo rikthyer në Tiranë, diskutuam edhe për bashkëpunimin e ngushtë me BE në çështje që lidhen me sigurinë, migracionin, luftën kundër krimit të organizuar si dhe mbështetjen e nevojshme në kuadër të programeve IPA”, shkruan Balla.
Ndërkohë, Balla ka pritur dje në një takim edhe gjeneralin Stuart Skeates, Koordinator Special i qeverisë së Mbretërisë së Bashkuar për Emigracionin e Paligjshëm. Siç bëri të ditur Ministria e Brendshme, në një reagim në rrjetet sociale, gjatë takimit, u evidentua fakti se rezultatet e taskforcës së përbashkët janë domethënëse, me një ulje prej 92 % të rasteve të emigrantëve të paligjshëm shqiptarë, krahasuar me vitin e kaluar.
“Në takimin me gjeneralin Stuart Skeates, Koordinator Special i qeverisë së Mbretërisë së Bashkuar për Emigracionin e Paligjshëm, ndamë qëndrime për marrëdhëniet e shkëlqyera mes vendeve tona dhe rezultatet e taskforcës së përbashkët, të cilat janë domethënëse me një ulje prej 92 % të rasteve të emigrantëve të paligjshëm shqiptarë krahasuar me vitin e kaluar”, njoftoi Ministria e Brendshme.