Detaje të reja janë zbardhur nga ngjarja e regjistruar pasditen e djeshëm në Sarandë, ku pronari i një restoranti ushtroi terror me thikë mbi disa klientë nga Delvina pasi nuk ishin dakord me faturën. Bëhet fjalë për shtetasin Alban Çoba, 48-vjeç, nga Fieri, pronar i restorant “Fantastic”.
Autoritet njoftojnë se Çoba ushtronte aktivitetin pa u regjistruar në organet tatimore. Gjithashtu, nga specialistët e AKU-së iu vendos masa administrative 300.000 lekë të rinj.
“Gjatë kontrollit në subjektin e tij, ku ditën e djeshme ky shtetas kanosi me mjet prerës thikë, disa klientë, shërbimet e Policisë kanë konstatuar se ky shtetas ushtronte aktivitetin pa u regjistruar në organet tatimore. Gjithashtu, nga specialistët e AKU-së iu vendos masa administrative 300.000 lekë të rinj.” thuhet në njoftimin e Policisë.
Alban Çoba vijon të jetë ende në kërkim nga Policia. Ngjarja ndodhi ditën e djeshme, rreth orës 18.00, në aksin Turizëm- Kanali i Çukës. Ndërkohë, policia nuk e ka gjetur as në lokal dhe as në banesë agresorin, dhe më pas e ka shpallur në kërkim.
Konflikti në fjalë duket një rast identik me atë të para 3 viteve, kur Mihal Kokëdhima, pronari i një restoranti në Porto Palermo u kalli “datën” një grupi turistësh spanjollë.