Arqipeshkvi i Metropolit Tiranë-Durrës ka uruar të gjithë besimtarët e krishterë në prag të vigjiljes së Krishtlindjes. Imzot George Frendo iu ka përcjellë besimtarëve shqiptarë urimin e Krishtlindjes, duke theksuar se ardhja e Jezusit në Botë ka shtruar themelet për një dinjitet të ri për njeriun.
Ndër të tjera, Imzot George Frendo i kërkon të gjithë shqiptarëve të mos mbështeten te politika për një vend pune, që të korruptojnë gjyqtarët për vendim, por të mbështeten te Jezusi, i cili sipas tij, na urdhëron të respektojmë dinjitetin dhe të drejtat e çdo njeriu.
“Krishtlindja na fton të mësojmë nga një foshnje. Në fytyrën e Jezusit fëmijë. Shohim fytyrën e çdo njeriu. Me ardhjen e tij në botë, Jezusi ka shtruar themelet për një dinjitet të ri për njeriun. Na urdhëron të respektojmë dinjitetin dhe të drejtat e çdo njeriu. E prandaj njeriu nuk duhet të ketë nevojë të afrojë një deputet, që t’i afrohet puna.
Nevojë që të paguajë një kirurg në një spital publik, që të bëjë një operacion. Nuk do të ketë nevojë që të korruptojnë një gjyqtar që të marrë vendimin e drejtë në Gjykatë”, është shprehur Imzot George Frendo.