Lajmi per mbylljen e TIkTok në Shqipëri ka gjetur pasqyrim të gjerë në mediat ndërkombëtare.
Duke theksuar si shkak vrasjen e 14-vjeçarit në shkollën 9-vjeçare “Fan Noli” në Tiranë, media si Corriere della Serra, La Repubblica, The Guardian, Reuters, Bloomberg, TRT, mediat serbe e greke kanë përcjellë për publikun e tyre vendimin e marrë nga qeveria shqiptare dhe të lajmëruar sot (21 dhjetor 2024) nga kryeministri Edi Rama.
Përtej raportimit të vendimit të qeverisë shqiptare, agjencia mediatike Reuters thotë se ka kontaktuar TikTok për një reagim, por kompania kineze nuk i është përgjigjur kërkesës deri më tani.
“Masa u mor si pjesë e një programi të ri kombëtar të sigurisë për fëmijët në shkolla”,- shkruan La Repubblica.
Rama tha këtë të shtunë se nga janari 2025, qeveria do të nisë punën për mbylljen e TikTok për një periudhë 1-vjeçare dhe kjo platformë nuk do jetë e aksesueshme në territorin e Shqipërisë nga asnjë moshë.
Kjo lëvizje e qeverisë erdhi pas tragjedisë së vrasjes së 14-vjeçarit Martin Cani pranë shkollës ‘Fan Noli’, që sipas qeverisë zanafilla e dhunës dhe bullizmit mes të miturve nisi në rrjetin social TikTok.