Sali Berisha e ka humbur betejën, për t’iu hequr “non grata” nga Britania e Madhe.
Por mediat dhe njerëzit e tij janë të revoltuar me një fakt: vendimi për lënien në fuqi të “non grata”-s, sipas tyre, është marrë nga një komision, jo nga një gjykatë.
“Sipas agjencisë BIRN, vendimi ndaj Berishës u mor nga një gjykatë.
“Gjykata angleze lë në fuqi sanksionet kundër Sali Berishës,” shkruan BIRN.
Në fakt BIRN e di shumë mirë se vendimi ka dalë nga një komision për çështjet e emigracionit.
Sikundër BIRN e di shumë mirë se kreu i opozitës kërkoi të ndiqte rrugën ligjore në gjykata, por kjo ishte instanca ku e drejtuan”, shkruan portali i familjes Berisha.
Ndërsa ish-deputeti me kobure, Gent Strazimiri, e shpjegon kështu:
“Quhet “Komisioni i Posaçëm i Apelimit të Emigracionit” (SIAC).
E thotë në fjalën e parë të emrit që është “Komision” e jo gjykatë!
“U krijua përmes “Aktit të Komisionit Special të Apelimit të Imigracionit” të vitit 1997.
Funksioni i SIAC është të dëgjojë ankesat nga individët që kanë qenë subjekt i vendimeve të imigracionit – si p.sh. të privuarit nga statusi i tyre ose të përjashtuar nga MB – për arsye që lidhen me ‘interesin publik’.
Vendime të tilla shpesh justifikohen në bazë të sigurisë kombëtare
SIAC është përmendur shpesh si gjykata ‘sekrete’ për shkak të faktit se individët që ndjekin ankesat përpara SIAC nuk janë njohur me të gjitha provat kundër tyre. Kjo për shkak se Sekretari i Shtetit për Departamentin e Brendshëm (SSHD) ka ‘certifikuar’ se vendimi në fjalë bazohet në prova të cilat nuk duhet të bëhen publike për arsye të sigurisë kombëtare, diplomacisë ndërkombëtare ose për arsye të tjera që kanë të bëjnë me interes publik.
Prova të tilla i jepen gjykatës në procese ‘të mbyllura’, të cilat nuk janë të hapura për ankuesit ose publikun, shpesh nga dëshmitarë nga shërbimet sekrete ose Agjencia Kombëtare e Krimit (‘NCA).”
Përse të gjitha mediat e qeverisë e “ngatërrojnë” duke e quajtur “gjykatë”?
A e kishin të vështirë t’i gjenin këto i formacione që kam shkruar më sipër?
Jo, aspak!
Unë i gjeta brenda pak sekondash duke googl-uar…
Po atëhere pse ky dezinformim?
Sepse u duhet një fitore “juridike”, “gjyqësore” ndaj Berishës, fitore të cilën nuk po e arrijnë dot as përmes SPAK e GJKKO në Shqipëri.
Interesant është fakti që në këtë batak dezinformimi ka rënë edhe BIRN, i cili në raportimin e tij i referohet të paktën tri herë me termin “gjykata” dhe “vendimi i gjykatës vendase”, atij që në fakt është thjesht një “Komision Apelimi” i administratës, pra një instancë ankimore administrative për të evituar proceset gjyqësore.
Lajmi është se procesi gjyqësor nuk u evitua dot, sepse Komisioni i Apelimit të administratës, mbajti anën e administratës…
Kaq e thjeshtë është”.
Pra gjithë problemin e kanë, të thonë se vendimi për lënien në fuqi të “non grata”-s për Berishën, është marrë nga një komision, jo nga një gjykatë.
A thua se vendimi është dhënë nga ndonjë OJQ, jo nga një institucion shtetëror, që përfaqëson Britaninë e Madhe.