Problemi i Cirkut Kombëtar nuk ka gjetur zgjidhje. Prej disa muajsh artistët i janë drejtuar Ministrisë së Kulturës, për të mbrojtur cirkun dhe të marri zgjidhje problemi me çadrën. Të hënën artisti Julian Kazazi, kryetar i Sindikatës së Pavarur të Artistëve të Cirkut Kombëtar u shpreh se njoftimi është që më datë 20 tetor paradite zyra e përmbarimit do të vijë të çmontojë çadrën.
Por ai tha se nga Ministria e Kulturës nuk ka asnjë përgjigje. “Sindikata e Pavarur e Artistëve të Cirkut Kombëtar ka që në muajin korrik që po kërkon një zgjidhje të problemit të çadrës së cirkut në institucionin epror, Ministria e Kulturës, duke qenë se jemi para një fakti se, “Cirkut i ka dal pronari”, dhe se në institucion ka ardhur njoftimi se me datë 20 tetor në orën 11:00, zyra e përmbarimit do vij të çmontojë çadrën (arenën) e Cirkut Kombëtar.
Jemi vetëm dy ditë përpara datës 20 tetor, e nuk kemi asnjë përgjigje se çfarë do ndodhi me Cirkun Kombëtar”, u shpreh ai. Kazazi tregon se sindikata ka bërë disa takime me sekretaren e përgjithshme të Ministrisë së Kulturës në lidhje me këtë problem.
Ai thotë se nëse ulet çadra fëmijët nuk do të kenë mundësi të shohin shfaqje. “Kemi kaq kohë që cirku ka probleme të tilla me truallin, ku ushtron aktivitetin e tij artistiko-kulturor prej 62 vitesh po në të njëjtat ambiente dhe po në të njëjtën truall. Jemi të shqetësuar, sepse nëse do arrihet të ulet çadra e cirkut nga zyra e përmbarimit me datë 20 tetor, fëmijët e Tiranës nuk do kenë mundësi të shikojnë më shfaqje cirku, çdo të shtunë e të diel siç ka qenë prej vitesh”, vijon artisti Julian Kazai, kryetar i Sindikatës së Pavarur të Artistëve të Tiranës dhe i Cirkut Kombëtar.
Shfaqje si protestë
Artisti Julian Kazazi njëkohësisht dhe kreu i sindikatës thotë se institucionet nuk kanë vëmendjen nga shteti. Kazazi kryetar i Sindikatës së Pavarur të Artistëve të Tiranës dhe i Cirkut Kombëtar bën thirrje në mbrojtje të cirkut. “Na vjen shumë keq si janë katandisur institucionet artistike në Shqipëri. Nuk kanë vëmendjen e duhur nga ka qeveria, nuk kanë vëmendjen e duhur nga politika.
I bëjmë thirrje publike Ministrisë së Kulturës dhe kryeministrit se: Fëmijët duan të shikojnë art; Fëmijët duan të shikojnë cirk; Fëmijët duan të kenë sa më shumë institucione artistike e kulturore për zhvillimin e tyre sa më të shëndetshëm, larg tabletave dhe smartphonave”, thotë Kazazi. Në datë 20 tetor Julian Kazazi shprehet se artistët do të jenë në cirk, me shfaqje në orën 10:00.
“Ne do të jemi aty për një shfaqje solidariteti, në formë proteste me art. Do jemi të gjithë artistë e cirkut duke performuar”, thotë ai. Sindikata e Pavarur e Artistëve të Shqipërisë i është drejtuar ministres së Kulturës Elva Margariti me shkresë nr. 516. prot., datë 12.10. 2021, ku ka kërkuar realizimin e 4 kërkesave, mes tyre dhe zgjidhjen e problemit për zhvendosen e Cirkut Kombëtar. Letra mban firmën e Julian Kazazit, kryetar i Sindikatës së Pavarur të Artistëve të Tiranës dhe Reshat Ibrahimit, president i Sindikatës së Pavarur të Artistëve të Shqipërisë.