Këshilli i Lartë Gjyqësor ka vendosur që të hetojë skandalet që kanë bërë ndër vite inspektorët e ish-Këshillit të Lartë të Drejtësisë. Pak ditë më parë gazeta raportoi se KLGJ do të ngrejë një komision të përkohshëm, i cili do të verifikojë punën e inspektorëve, pasi shumë prej tyre nuk kanë marrë parasysh ankesat e qytetarëve ndaj gjyqtarëve. Ndërsa sot gazeta po zbardh diskutimet e mbledhjes së KLGJ, ku jepen detaje rreth përbërjes së këtij komisioni të përkohshëm dhe mënyrës sesi do të kalojë në sitë puna e inspektorëve të ish-KLD.
Komisioni i sapo ngritur do të marrë në shqyrtim 183 ankesa të qytetarëve. Ankesat janë depozituar pranë Këshillit të Lartë të Gjyqësor dhe kanë të bëjnë me vendimmarrjen e Kryeinspektorit të ish-Këshillit të Lartë të Drejtësisë për arkivimin e ankesës apo pushimin e hetimit ndaj një gjyqtari. Fillimisht në mbledhjen e zbardhur nga gazeta pati debate nëse ky komision duhet të jetë i përkohshëm dhe të merret vetëm me shqyrtimin e 183 ankimimeve apo duhet të vijojë punën edhe kur të ngrihet Inspektorati i Lartë i Drejtësisë.
“Një problem ishte afati kohor që duhet të funksiononte ky Komision, që Komisioni i Disiplinës kishte mendimin që ky afat duhet të lidhesh me ngritjen e institucionit të ri, pra të Inspektorit të Lartë të Drejtësisë, kurse një pjesë e anëtarëve të Këshillit të Lartë të Drejtësisë (Këshillit të Lartë Gjyqësor), kanë mendimin se duhet të lidhet ngushtësisht me këto 183 çështje”, u shpreh anëtari i KLGJ, Medi Bici. Në fund, në konsultim edhe me misionet Euralius dhe Opdat u vendos që komisioni të merret vetëm me shqyrtimin e 183 ankesave dhe më pas do të pushojë së ekzistuari.
Zbardhja e skandaleve
Komisioni i Përkohshëm do të shqyrtojë me imtësi çdo ankesë të qytetarëve të regjistruar pranë KLGJ, ndërsa më pas do të vendosë nëse ankimi do të pranohet apo jo. Nëse Komisioni shikon se në ankesat e qytetarëve ka baza që tregojnë se inspektorët e ish-KLD kanë shkelur rregullat, atëherë rrëzohet vendimi i dhënë nga Kryeinspektori i ish-KLD dhe pranohet ankimi. Çështja më pas regjistrohet dhe lihet në pritje deri në momentin që do të ngrihet Inspektorati i Lartë i Drejtësisë.
“Në rastin kur Komisioni i Përkohshëm pranon ankimin, pra rrëzon vendimin e dhënë nga Kryeinspektori i ish-KLD, njoftohen palët dhe çështja regjistrohet në një regjistër të veçantë të krijuar për këtë qëllim, në pritje për t’i kaluar hetimeve të mëtejshme Inspektorit të Lartë të Drejtësisë, menjëherë sapo të ngrihet ky institucion”, tha Medi Bici. Vijimi i mbledhjes përcaktoi edhe përbërjen e Komisionit të Përkohshëm që do të kalojë në sitë ankesat e qytetarëve për punën e Inspektoratit të ish-KLD dhe do të nxjerrë në pah skandalet e tij.
Ligji parashikon që dy nga anëtarët duhet të jenë anëtarët jo gjyqtarë të KLGJ, ndërsa një duhet të jetë anëtari gjyqtar i KLGJ. Pra në total, komisioni do të ketë 3 anëtarë. Përmes shortit u përcaktua që dy anëtarët jo gjyqtarë të jenë Fatmira Luli dhe Alban Toro. Ndërsa anëtari gjyqtar u zgjodh Dritan Hallunaj. Me propozimin e kryetares së KLGJ, Naureda Llagami, Alban Toro u zgjodh kryetar i Komisionit të Përkohshëm.
Sipas raporteve të ish-KLD, inspektorët kanë anashkaluar shumicën e ankesave të qytetarëve dhe po ashtu shumicën e tyre i kanë kaluar me vërejtje. Sipas raporteve, në një vit ka rreth 850 ankesa nga qytetarët, por vetëm një përqindje e ulët e tyre janë marrë parasysh. Nga këto ankesa, 183 janë depozituar tashmë pranë KLGJ dhe do të vëzhgohet me kujdes e gjithë puna e bërë nga inspektorët, për të nxjerrë në pah shkeljet./Mimoza IBRA