Presidenti francez Emmanuel Macron dhe kancelari gjerman Olaf Scholz diskutuan në Paris për sfidën e paraqitur nga presidenti amerikan Donald Trump. Ata theksuan forcën dhe unitetin e Evropës përballë kërcënimeve për tarifat nga presidenti amerikan.
Gjatë një konference të përbashkët shtypi përpara drekës së tyre të punës në Pallatin Elysee, Macron tha se ishte një moment kritik për Francën dhe Gjermaninë që të merrnin një rol udhëheqës dhe të siguronin që Evropa të ishte e aftë të mbronte interesat e saj duke ruajtur lidhjet transatlantike.
“Tani që administrata e re ka marrë detyrën në Shtetet e Bashkuara, është më e rëndësishme se kurrë për evropianët, dhe për rrjedhojë për dy vendet tona, të luajnë rolin e tyre të plotë në konsolidimin e një Evrope të bashkuar, të fortë dhe sovrane”, tha Macron.
Duke mbështetur fjalët e presidentit frances, Scholz theksoi se presidenca e Trump do të kishte sfida, por duke riafirmuar marrëdhënien e gjatë të miqësisë midis BE-së dhe SHBA-së.
“Këtë javë kemi të bëjmë me një administratë të re amerikane. Është tashmë e qartë se presidenti Trump do të jetë një sfidë. Pozicioni ynë është i qartë. Evropa është një zonë e madhe ekonomike me rreth 450 milionë qytetarë. Ne jemi të fortë. Ne qëndrojmë së bashku. Evropa nuk do të fshihet,” theksoi Scholz.
Trump tha të martën se do të vendoste tarifa ndaj BE-së për shkak të suficiteve tregtare me SHBA-në. Ai kërcënoi gjithashtu Kanadanë, Meksikën dhe Kinën me detyrime të rënda duke filluar nga shkurti.
Macron dhe Scholz diskutuan për industrinë e çelikut, të automobilave dhe atë kimike, të cilat mund të goditen nga tarifat e SHBA, dhe thanë se ato ishin jetike për ekonominë e BE-së.
Kancelari gjerman theksoi gjithashtu nevojën për rritjen e bashkëpunimit evropian në fushën e mbrojtjes, duke përmendur iniciativat franko-gjermane për të zhvilluar armë precize me rreze më të gjatë.
Ndërkohë, presidenti i Francës tha se Evropa duhet të rrisë shpenzimet për mbrojtjen e saj dhe gjithashtu “të zhvillojë bazën e saj industriale, kapacitetet e saj dhe industrinë e saj”.
Në fillim të këtij muaji, Trump u bëri thirrje 32 vendeve anëtare të NATO-s që të shpenzojnë 5% të PBB-së së tyre për mbrojtje, nga objektivi ekzistues prej 2%, dhe tha se aleatët evropianë po dështonin.