Rusia zyrtarisht ka ngritur një aktakuzë në mungesë për një gjykatës dhe prokuror të Gjykatës Penale Ndërkombëtare (GJNP), të cilët lëshuan një urdhër arresti për krime lufte ndaj Vladimir Putinit.
Komiteti Hetues tha se gjyqtari, Rosario Salvatore Aitala dhe prokurori britanik Karim Khan u akuzuan të dy për “përgatitje për të sulmuar një përfaqësues të një vendi të huaj që gëzon mbrojtje ndërkombëtare në mënyrë që të ndërlikojnë marrëdhëniet ndërkombëtare”.
Sipas asaj që flitet në mediat ruse, gjykatësi dhe prokurori i Gjykatës Penale Ndërkombëtare mund të dënohen në mungesë deri në 12 vite burg.
Komiteti Hetues rus tha se zyrtarë të tjerë të GJNP janë duke u hetuar lidhur me rastin dhe se ndaj tyre mund të ngrihen akuza në të ardhmen.
Urdhri i lëshuar kundër Putinit në mars e akuzon atë për përgjegjësi personale për rrëmbimet e fëmijëve nga Ukraina. Gjykata akuzoi gjithashtu Maria Lvova-Belova, komisioneren presidenciale ruse për të drejtat e fëmijëve. Arrestimi i tyre nuk është i mundur, pasi Rusia nuk është pjesë e juridiksionit të kësaj gjykate.