Pas reagimeve të kryeministrit Edi Rama dhe delegacionit të BE në vendin tonë për deklaratat e bëra dje nga Presidenti i Republikës Ilir Meta për reformën në drejtësi dhe EURALIUS ka ardhur një përgjigje tjetër nga Presidenca.
Në një reagim sot për mediat, thuhet se Presidenti Meta i ka bërë të gjitha përpjekjet dhe do të vazhdojë të bëjë çdo përpjekje për zbatimin kushtetues të reformës në drejtësi. Por se Presidenti nuk ndalon askënd, të këndojë “na fitorja në fitorje”, si në variantin solo, ashtu edhe në kor”.
REAGIMI I PLOTË
“Zëdhënësi i Presidentit të Republikës, z.Tedi Blushi i pyetur nga mediat për një reagim lidhur me qëndrimet e shprehur dje nga ambasadori i BE dhe kryeministri Rama për reformën në drejtësi sqaron se:
Kam vetëm një qëndrim për të dy.
Presidenti i Republikës, jo vetëm i ka bërë të gjitha përpjekjet e mundshme deri tani, në mënyrë transparente e sistematike, të dokumentuar dhe informale, konstruktive e gjithëpërfshirëse, por edhe do të vazhdojë të bëjë çdo përpjekje për zbatimin kushtetues të reformës në drejtësi, për të evituar vonesat, kolapsin, zbatimin e njëanshëm e përçarës dhe kapjen e sistemit.
Presidenti nuk do të lodhet edhe në të ardhmen, si detyrim ndaj qytetarëve shqiptarë, të punojë në këtë frymë. Ndërkohë Presidenti nuk ndalon askënd, të këndojë “na fitorja në fitorje”, si në variantin solo, ashtu edhe në kor”.