Televizioni publik shqiptar ka një traditë të konsoliduar në prodhimin e situatave komike, aq sa mund të konsiderohet një shkollë barcaletash e medias shqiptare.
Nuk ka si të ndodhë ndryshe me një institucion në krizë identiteti, që lindi si mjet propagande dhe po mbijeton si altoparlant i ndryshkur i qeverive djathtiste e majtiste.
Situata më e fundit absurde ka ndodhur pak ditë më parë, kur regjizorit të një emisioni në RTSH i lindi ideja të postojë një vlerësim në Instagram për emisionin ku punonte vetë.
Bëhet fjalë për regjizorin Ergi Hasko i cili postoi një foto në Instagram dhe shkruajti: “I vetmi emision i vlerave në RTSH @një natë sa një jetë”. Kaq ka mjaftuar dhe regjizori të pushohet nga puna.
Sipas drejtorit të RTSH, Alfred Peza ky postim ka dëmtuar reputacionin e televizionit publik shqiptar. Nëse nuk do të ishte dokumenti më poshtë, një idiotësi si kjo është e pamundur të besohet.
