Largimi i Fatmir Xhafajt nga posti i ministrit të Brendshëm ka rikthyer ankthin në radhët e qeverisë. Gazeta ka mësuar se ditët e fundit të gjithë ministrat janë shqetësuar, pasi i tremben faktit se kryeministri Edi Rama mund të bëjë lëvizje të tjera. Shefi i qeverisë që në shtator ja u bëri të qartë të gjithëve se nëse nuk përmbushin detyrat që ai u ka lënë, do të duhet që të largohen. Xhafaj ishte një ndër ta, pasi përveç aksionit “Volvo 4” dhe ndaj grupit “Bajri”, nuk bëri asnjë goditje tjetër, ndonëse BE kërkoi që deri në dhjetor të ketë arrestime për korrupsion dhe të shkatërrohen bandat. Por në radhët e qeverisë ka dhe shumë emra që nuk po i përmbushin direktivat dhe kjo ka bërë që të gjithë të jenë në ankth, pasi presin që kryeministri të komunikojë dhe për shkarkime të tjera. Një sinjal për këtë gjë e ka dhe këshilltari i Ramës, zoti Baton Haxhiu.
Ai tha se Rama do largojë dhe emra të tjerë në ditët në vijim, ndërsa u shpreh se po bëhen sondazhe për performancën e secilit ministër. Gazeta e deklaroi që javë më parë se Rama ka nisur sondazhet dhe për të gjithë ata emra që qytetarët mendojnë se nuk janë produktivë, do bëhet zëvendësimi. “Kryeministri ka larguar njerëzit. Ky kryeministër mori guximin që të heqë një kastë politike dhe të emërojë një kastë tjetër duke emëruar Tahirin. Tahiri nuk mundi të mbante peshën dhe nuk është më ministër. Rama e bën për t’i vënë vijë të kuqe korrupsionit dhe duke i vënë vijën e kuqe të kaluarës. Xhafa është ministri i dytë të cilit opinioni publik nëpërmjet sondazheve i ka kërkuar të largohet. Opinioni publik nuk e do. Do largohen edhe ministra të tjerë. E njoh logjikën e Ramës.
Rama këtë e ka bërë për PS, për një mandat të ardhshëm. Ky nuk do të jetë i fundit, nuk ka njeri që nuk mund të ndërtojë edhe miqësi, edhe pushtet edhe gabime”, tha Baton Haxhiu. Nga ana tjetër, vetë gazeta ka mësuar se Rama deri në dhjetor pritet që të lëvizë dhe emra të tjerë, që kanë të bëjnë drejtpërdrejt me reformën në drejtësi dhe ndëshkimin e korrupsionit. Po ashtu me ardhjen e Sandër Lleshit pritet të ketë lëvizje dhe në radhët e policisë.
Kushtet e Ramës
Pasi u mbyllën pushimet verore, Rama mblodhi në Vlorë të gjithë ministrat dhe aty u dha nga një listë me detyra. Në atë takim shefi i qeverisë ja u bëri të ditur se nëse nuk realizohen objektivat, atëherë do ketë shkarkime. Objektivat kanë të bëjnë me kushtet e BE. Në qershor u vendos shtyrja e dhënies së statusit dhe u lanë disa detyra shtëpie, ku më kryesoret janë lufta ndaj korrupsionit, ngritja e SPAK dhe zbatimi i reformës në drejtësi. Në dhjetor do të ketë një mbledhje mes ministrave shqiptarë dhe reporterëve të BE dhe aty do kërkohet llogari mbi realizimin e reformave.
Rama kur mblodhi Kryesinë dhe Asamblenë e PS, ja u bëri të ditur ministrave se askush nuk e ka të sigurt vendin. Nëse ata deri në dhjetor nuk i mbyllin objektivat, do duhet që të dalin nga qeveria. Ky ultimatum i Ramës dhe largimi i Xhafajt i ka shqetësuar të gjithë ditë e fundit. Sipas burimeve të gazetës, të gjithë ministrat nga dita në ditë presin njoftimin nga Rama se do të largohen. Ndërkohë sot pritet që Meta të japë dekretin për Sandër Lleshin, duke i hapur rrugë largimit të Xhafajt./ Kliti TOPALLI