Lajmi i bujshëm për azilin, Kadare e ridëgjon pas 28 vitesh dhe bën komentin pikant: Shumë e kjartë, pse më kritikojnë ca tashi (Video)

Një video interesante e shkrimtarit të madh Ismail Kadare me gazetarin Elez Biberaj në një restorant të Tiranës.

Gazetari i ka vënë shkrimtarit të dëgjojë zërin e tij regjistruar në radio, 28 vite më parë, në intervistën e parë që dha Kadare pasi iku në Francë.

Më 24 tetor 1990, në ora 18.00, gazetari Elez Biberaj, nëpërmjet valëve të “Zërit të Amerikës”, dha lajmin e bujshëm se Kadare kishte kërkuar strehim politik në Francë. Më pas u dëgjua dhe intervista që Kadare i kishte dhënë Biberajt pikërisht për vendimin e tij, për të lënë Shqipërinë komuniste.

Njëzet e tetë vjet më vonë,Kadareja u takua me intervistuesin e tij dhe biseda miqësore u zhvillua teksa të gjithë dëgjonim regjistrimin e atij emisioni të rrallë, i cili pati një jehonë të jashtëzakonshme tek të gjithë shqiptarët, kudo në botë.

“Paska qenë shumë e kjartë, pse më kritikojnë ca tashi, janë thënë të gjitha…”, thotë Kadare pasi dëgjoi regjistrimin.

I pyetur se përse zgjodhi Francën në një nga intervistat e tij Kadare shprehet: “Franca për shqiptarët, ashtu si për gjithë ballkanasit, u bë e afërt sidomos gjatë kohës së Napoleonit, si shembull frymëzimi për t’u shkëputur nga sundimi osman. Kronikat tregojnë se në Ballkan, e sidomos në viset e Shqipërisë, pati një kohë kur «Marsejeza» u këndua si këngë patriotike vendase! Kam kërkuar azilin politik, pas një letërkëmbimi të ashpër me presidentin Alia, ku përfundimisht kuptova se asnjë shpresë nuk mund të pritej prej tij, në kohën kur shumë njerëz besonin se ai mund të bëhej si një Gorbaçov shqiptar.”