Ambasadorja e SHBA në Tiranë Yuri Kim, ka dhënë një tjetër mesazh të fortë sa i përket reformës në drejtësi. Të premten, ambasadorja dha alarmin se shumë politikanë po tentojnë sabotimin e reformës në drejtësi, ndërsa dje ka deklaruar se reforma nuk po ecën me ritmin e duhur. Nga Pusteci i Korçës, ku mori pjesë në “Mik Festival”, ambasadorja e SHBA, Yuri Kim, në fjalën e saj e vuri theksin te reforma në drejtësi, nga ku theksoi se tani është koha për të vazhduar përpara dhe për të mos u dorëzuar.
“Kam shpresë të pafundme për Shqipërinë. Unë mendoj që reforma në drejtësi po çohet përpara, ngadalë, më ngadalë se sa do të donim ne, por është padyshim duke ecur përpara. Qytetarët duhet të vazhdojnë të jenë të pakënaqur, duhet të jenë më tepër kërkues me qeveritarët e tyre, njerëzit që ata kanë zgjedhur dhe duhet të vazhdojnë përpara. Tani është koha që të vazhdojmë përpara.
Mos u dorëzoni. Disa njerëz thonë që reforma në drejtësi është asgjë, duhet të mos dorëzohemi, mos hiqni dorë”, tha ajo. E pyetur nëse po shkohet drejt “peshkut të madh”, e përdorur për kokat e mëdha të krimit në Shqipëri, ambasadorja Kim u shpreh se institucionet shqiptare duhet të përmbushin pritshmëritë.
Ajo theksoi, se këto të fundit i dinë cilat janë përgjegjësitë e tyre dhe duhet të mbështeten për t’i përmbushur ato. “Unë jam diplomate, nuk jam një persekutore, nuk jam një peshkatare, nuk jam gjyqtare, unë jam thjesht një diplomate. Institucionet kanë përgjegjësinë e tyre, ata e dinë se cilat janë përgjegjësitë e tyre, unë mendoj që ata po nisin t’i përmbushin ato. Le të mbështesim ata. Ajo që dua të flas në fakt është kultura shqiptare dhe mundësia e madhe për të qenë me “Mik Festival” dhe të dëgjonim “zanat”, nuk është vetëm reforma e drejtësisë, është bukuria e Shqipërisë dhe shpirti i shqiptarëve që më jep shpresë”, tha ajo.
Goditja e ambasadores
Ambasadorja amerikane bëri pasdite dhe një postim në rrjetet sociale po mbi reformën në drejtësi, duke lëshuar mesazhe të koduar. Sipas saj, pavarësisht shumë cinikëve, reforma do të ecë para. “Unë u thashë atyre se kam shpresë të pafund në Shqipëri; që megjithë obstruksionizmin dhe cinizmin e disave, reforma në drejtësi po tregon gjithnjë e më shumë rezultate çdo ditë; dhe se është kritike tani që populli shqiptar të vazhdojë të kërkojë ndryshimin, të vazhdojë të ecë përpara së bashku, të mos dorëzohet kurrë. Unë kam pasur mundësinë të udhëtoj përreth Shqipërisë dhe të takoj shumë njerëz – nga veriu në jug, nga malet në bregdet. Bukuria e këtij vendi, forca dhe vendosmëria e njerëzve të tij janë frymëzuese.
Le të vazhdojmë përpara së bashku. Le të vazhdojmë të zgjedhim shpresën (e cila kërkon shumë punë) mbi cinizmin (i cili për mendimin tim është dembel moralisht dhe intelektualisht). Le të vazhdojmë të ndërtojmë të ardhmen që Shqipëria meriton. Do të jetë punë e vështirë, por ne do të jetë me ju çdo hap deri në të fund”, tha ajo.