Ermal Beqiri eksperti që në Gjykatën e Lartë, rrëzoi videon e korrupsionit Meta-Prifti. Ata që nuk e njohin le ta shikojne. Është njeriu që shoqëronte Spartak Brahon, kur ky i fundit hynte tek tatimet në vitin 2014, kur u fshi serveri i të dhënave të tatimeve. Personi që shkon nga pas Spartak Brahos, është Ermal Beqiri
Më pas për disa kohë, drejtor i IT-së, në hipotekë. Në një investigim të bërë rezultoi se Ermal Beqiri fshihej pas “Soft&Solution”, dhe i jepte tendera vetes së vet kur ishte drejtor. Ata që nuk e njohin ndoshta janë shumica e shqiptarëve por nuk është anonim, është personi i skandaleve të firmës së byzylykëve në Ministrinë e Drejtësisë. Njeriu i cili ndodhet në hetim nga prokuroria, sepse byzylykët nuk çoheshin tek Ministria e Drejtësisë. Ish-ministri i PD, Gazmend Bardhi e kallëzoi penalisht.
Dosja me “qetësi, dashuri dhe para” u mbyll nga prokuroria, nuk ka si shpjegohet ndryshe vendimi i gjykatës i 28 dhjetorit, i cili urdhëronte prokurorinë të hapte dosjet, këtë herë jo nga një ministër i PD, por nga ministrja e re e Drejtësisë e cila kërkonte të çonte deri në fund hetimin për skandalin e korrupsionit të byzylykëve në këtë ministri. Pa folur pastaj për faktin se nuk punonte aspak mbikqyrja dhe shërbimi i provës, prej disa kohësh u ka kërkuar gjykatave të mos japin vendime me mbikëqyrje elektronike.
Por le të kthehemi tek tenderat që ka perfituar nga ajo kohë e deri sot
Në kohën kur Ermal Beqiri ka qenë drejtor informatik i Zyrës së Regjistrimit të Pasurisë së Paluajtshme (ZRPP), shoqëria Soft & Solutions, e lidhur me të, ka fituar mjaft tendera nga vetë ZRPP. Kjo është si të thuash se Ermal Beqiri ishte drejtues i një zyre, që i jepte punë publike një ndërmarrjeje të lidhur me të.
shoqëria Soft & Solutions, zyrtarisht në pronësi të Arjola Koromanit, në të vërtetë është e lidhur drejtpërsëdrejti me Ermal Beqirin, ekspert informaticien, ish-profesor pranë Universitetit Kristal, që ka arritur suksesin profesional në sajë të lidhjeve me politikën dhe që, pas zgjedhjeve të vitit 2013, u emërua drejtor informatik i ZRPP-së.
Nga ky pozicion, Beqiri ka patur në dorë personalisht të gjitha garat për furnizimin e materialeve apo produkteve informatike që nevojiteshin për punën e Hipotekave shqiptare. Përpara se të mbulonte këtë detyrë të rëndësishme në administratën publike, Beqiri ka qenë një ndër tre ekspertët e gjykatës, që çmontoi besueshmërinë e videopërgjimit të bërë nga Dritan Prifti kundër Ilir Metës, një ekspertizë kjo, vendimtare për shpalljen të pafajshëm të Metës nga Gjykata e Lartë.
Pas fitores së qershorit 2013 nga koalicioni PS-LSI, Beqiri u mor edhe si konsulent i qeverisë për hetimet e brendshme mbi skandalin e serverit të Tatimeve. Detyra delikate këto, për të cilat më pas u shpërblye me emërimin si drejtor informatik i Hipotekave.
Ndërkohë, një bashkëpunëtore e Ermal Beqirit, Arjola Koromani, kishte krijuar shoqërinë informatike Soft & Solutions, e cila deri në vitin 2014 llogariste një xhiro prej vetëm 10 milionë lekësh në vit. Por, pas emërimit të Beqirit në Hipotekë, puna ecën ndryshe.
Më 17 gusht 2015 Soft & Solutions fiton nga ZRPP një garë me vlerë 3.894.000 lekë për blerjen e disa software-ve: në garë janë edhe dy ndërmarrje të tjera, por natyrisht atë e fiton Soft & Solutions.
Më 28 gusht Soft & Solutions fiton një garë të dytë nga ZRPP, në bashkëpunim me një ndërmarrje tjetër, me një vlerë prej 9 milionë lekësh.
Më 14.12.2015 fiton një garë të tretë, gjithnjë të shpallur nga ZRPP, me një vlerë prej 3.250.000 lekësh për blerje software-sh: në garë është edhe një subjekt tjetër, që ofron çmim më të ulët, por natyrisht është Soft & Solutions ajo që fiton.
Por më 22 dhjetor 2015 shënohet goditja e parë e madhe: Soft & Solutions bashke menje firme tjetër fiton nga ZRPP një garë të katërt, me vlerë 26.579.000 lekë. Këtu, pak a shumë siç ndodhi me 300 byzylykët që duhej të dorëzoheshin brenda një afati rekord prej dy javësh, në shpalljen e garës saktësohej që dorëzimi i një moduli të posaçëm dixhital duhej të bëhej “brenda 31 dhjetorit”, domethënë tetë ditë pas mbylljes së garës, në kulmin e festave të fundvitit. Edhe për këtë nuk ka konkurrentë të tjerë dhe Soft & Solutions fiton me një skonto prej vetëm 87 mijë lekësh.
Vetëm në këta katër muaj të vitit 2015, Soft & Solutions fitoi, nga zyra që drejtohej prej Ermal Beqirit, tendera me një vlerë të përgjithshme katër herë më të madhe se e gjithë xhiroja e deklaruar nga shoqëria në bilancet e vitit 2014. Por edhe atëhere, po ta shohësh me kujdes, të ardhurat më të mëdha ndër punët publike të kryera vinin nga Universiteti i Tiranës, ku kishte punuar në të kaluarën Ermal Beqiri dhe ku, si pasojë, ruante kontakte me leverdi, shkruan Shqiptarja.com.
Konflikti i interesit në këto katër tendera të ZRPP-së është jashtëzakonisht i madh.
Arjola Koromani, pronare me letra e Soft & Solutions, në fakt është e lidhur drejtpërsëdrejti me Ermal Beqirin, të cilit i ka shërbyer edhe si përfaqësuese ligjore.
Pranë selisë së Soft & Solutions në adresën rruga Hoxha Tahsim, nr. 2, kati 2 në Tiranë, është regjistruar edhe shoqëria Forensic Lab, që më parë ishte e regjistruar me seli pranë zyrave të Ermal Beqirit. Dhe në parkimin e rezervuar për Soft & Solutions, para selisë së shoqërisë, parkohet gjithnjë Mercedesi i Ermal Beqirit dhe i askujt tjetër, pikërisht siç i lejohet një pronari.
Një lidhje kaq e ngushtë kjo, sa të bën të dyshosh se Ermal Beqiri është pronari i vërtetë i shoqërisë, të cilës, në cilësinë e drejtorit informatik të ZRPP, duhet t’i ketë dhënë si fituese tenderat e veta.
Biznesi mes Soft & Solutions dhe ZRPP mund të ketë qenë edhe më i madh se kaq. Në vitin 2016 ZRPP hap garë me vlerë 296 milionë lekë (të reja), gati 2.5 milionë euro, për dixhitalizimin e 51 shërbimeve të hipotekave.
Gara fitohet nga një grup subjektesh, emri i të cilëve nuk u bë asnjëherë publik, me përjashtim të njërit prej tyre, ATD shpk, i vetmi subjekt për të cilin jepen të dhëna në buletinin zyrtar të Agjencisë së Prokurimit Publik, si ndërmarrja përfaqësuese e tyre.
APP zakonisht publikon informacionet që i jepen nga institucioni i cili drejton garën, që në këtë rast është ZRPP. A mos vallë ZRPP, domethënë Ermal Beqiri, ka sjellë të dhëna jo të plota për të fshehur praninë e Soft & Solutions mes shoqërive fituese? Ligji detyron të bëhen publike të gjithë emrat e shoqërive fituese, por këtë herë APP nuk e ka vënë re këtë harresë të rëndë. Duhet theksuar se për këtë nuk ka prova, por megjithatë dyshimet janë të forta.
Nga ana tjetër, që biznesi i Soft & Solutions në 2016-ën ka ecur më së miri, këtë e tregojnë të dhënat e bilancit të saj, me të ardhura në masën 451 milionë lekë të reja, 1.500% më shumë se sa kishte arkëtuar më 2014. Miliona euro, të cilat shoqëria vetëm pjesërisht i ka marrë nga ZRPP: duke investiguar mes shumë tenderave të tjerë që ka fituar, në të vërtetë zbulohet se janë të shumtë edhe institucionet e tjera publike që e kanë favorizuar. Një punë e suksesshme, e kryer në fshehtësi dhe heshtje gjatë tre viteve, por që incidenti me 300 byzylykët elektronikë për të burgosurit, në mënyrë të papritur, e nxori në dritë.
Ermali është ushtari i Metës dhe për nderin që bëri përfitoi mjaft peta nga byreku i tepasisë LSI!