Pas “Foltores” së “Nju Gjersit”, ku veprimtarja Ervis Kokpalari njoftoi se PD do transformohet në Parti Konservatore, pati një reagim të ashpër nga Kujtim Gjuzi, që është kryetar i Partisë Konservatore në Shqipëri:
“E nderuara Kokpalari!
Mësova se doni të më vidhni emrin dhe idetë e partisë sime, në të cilën kam 20 vite që kontribuoj.
Kjo është një gjë e rëndë, që nuk u shkon fare konservatorëve.
Ne konservatorët bazohemi mbi vlerat morale, familjare dhe historike, dhe jo mbi vjedhjet e vulave dhe formularëve.
Prandaj pikë së pari, duhet të tërheqësh atë që ke thënë në “Foltoren” e Nju Gjersit, dhe t’iu kërkosh ndjesë gjithë konservatorëve të vërtetë të Shqipërisë.
Unë personalisht kam marrëdhënie me Doktorin dhe e kam pritur dy herë në audiencë.
Kohët e fundit nuk e kam thirrur, por po e mendoj këtë gjë.
Lajmi juaj se keni ndërmend të më vidhni mua vulën dhe emrin e partisë më mërziti shumë, ndaj mendoj se do ta thërras Doktorin t’ia them disa gjëra në sy.
Ju meqë nuk i merrni dot emrin dhe vulën Lul Bashës, doni të ma vidhni atë mua.
Po unë nuk jam Lul Basha.
Unë iu ftoj të gjithëve pas Kuvendit të 11 dhjetorit të vini në selinë e partisë dhe ua dorëzoj vullnetarisht të gjitha, me kusht që të më rizgjidhni një mandat në krye të partisë.
Dua ta shikoj një herë plot atë parti, se kam tërë jetën që mbaj pak anëtarë, ngaqë jemi parti me sqimë e nuk pranojmë dokëdo.
Prandaj nëse e doni vërtet partinë, jeni të detyruar ta merrni me mua kryetar.
Lisi ikën bashkë me hijen e tij dhe Partia Konservatore ikën bashkë me liderin e saj.
Mirë u takofshim dhe na shkoftë mbarë”.