Mesazhet e sotme të politikanëve shqiptarë me rastin e Kurban Bajramit nuk ishin vetëm për popullin, por edhe për vetë ata.
Mes thirrjeve për bashkëpunim e mirëkuptim mund të veçojmë mesazhin e kryetares së LSI-së, Monika Kryemadhi, e cila duket se lëshon një mesazh të koduar, për Ramën teksa thotë se duhet të jenë sërish vëllezër me njëri-tjetrin.
Mesazhi i Monika Kryemadhit
“Për gjithë besimtarët mysliman dhe për gjithë shqiptarët në fakt në këtë ditë të sakrificës dhe të flijimit të ditës së Kurban Bajramit dua tu uroj paqe, begati, mirësi dhe të ndajmë mirësinë me njëri-tjetrin, të ndajmë begatinë me njëri-tjetrin dhe të largojmë urrejtjen dhe dëshpërimin nga njëri-tjetri.
Sot në këtë ditë të shënuar, e cila në njëfarë mënyre na kujton të gjithëve të reflektojmë, që jemi të barabartë përpara Zotit, le të jemi përsëri vëllezër me njëri tjetrin, të jemi përsëri të angazhuar me njëri-tjetrin për të bërë mirë për Shqipërinë dhe shqiptarët kudo që janë.
Dua tu uroj dhe juve që në këtë ditë pushimi nuk ndaloni për tu shërbyer qytetarëve dhe për ti informuar ata. Mbarësi, begati dhe të mira paçi në familjet tuaja”, tha Kryemadhi.