Ndërsa Edi Rama mwe qese në dorë na flet për ruajtjen e mjedisit dhe për një Shqipëri të pastër treshja Arbër Teqja, Ervin Meçe dhe Adriatik Mema marrin tendera me vlerë miliona euro nga Ministria e Shëndetësisë dhe degët e saj, gjoja për trajtimin dhe asgjësimin e mbetjeve spitalore, mbetje të cilat më pas i hedhin në lumenj, përrenj, fusha, kazanë mbeturinash etj., duke kryer një krim kundër shëndetit të qytetarëve dhe mjedisit me pasoja të tmerrshme, duke kryer një vepër kriminale të pashqetësuar nga askush.
Edhe pse Kodi Penal është ashpërsuar vitet e fundit për krimet kundër mjedisit duke i barazuar gati me vrasjen, kompania ‘Eco Riciklim’ vijon të lidhë kontrata për asgjësimin e mbetjeve spitalore, duke mashtruar me këtë proces, pasi sipas një dosje që disponojmë nuk e ka dokumentuar dhe faktuar kurrë procesin e asgjësimi deri në fund siç parashikohet në kontratë.
Ky aktivitet kriminal kryhet në bashkëpunim me Ministrinë e Mjedisit, Ministrinë e Shëndetësisë dhe QSUT, ndërsa policia dhe prokuroria vijojnë të mbyllin njëri sy.
Le të ndalemi tek faktet dhe rrethanat konkrete, të cilat duhet të jenë menjëherë objekt i prokurorisë dhe që duhet të alarmojnë shtetin shqiptar.
Pas një lufte të gjatë procedurash me ankesa deri në gjykatën e tenderave, në nëntor të vitit 2020, ish-drejtori i QSUT, Enkelejdi Joti ka shpallur fituese kompaninë ‘Eco Riciklim’ me nipt: L61814009B, në pronësi të Arbër Teqja, Ervin Meçe dhe Adriatik Mema, të tenderit me objekt “Trajtimi dhe asgjësimi i mbetjeve që dalin nga shërbimi ku marrin trajtim pacientët me Covid-19”.
Dyshimet e para që ‘Eco Riciklim’ nuk i asgjëson mbetjet, por vetëm merr paratë, nisin që nga oferta fituese. Në këtë rast, oferta fituese është 90 milionë lekë, ndërkohë që fondi limit është 140 milionë lekë. Kemi të bëjmë me një ofertë anomalish të ulët, pasi trajtimi dhe asgjësimi i mbetjeve të rrezikshme spitalore ka një kosto shumë të lartë, gjithnjë nëse ky proces realizohet.
Nga dosja me dokumente zyrtare që kemi siguruar, rezulton se Arbër Teqja, Ervin Meçe dhe Adriatik Mema, pasi ka futur në xhep 90 milionë lekë, kanë zhdukur mbetet spitalore që kanë marrë në dorëzim nga spitalet anti-covid. Nuk ekziston asnjë dokumentacion që të vërtetojë asgjësimin dhe sidomos asgjësimin e hirit të mbetjeve të marra në dorëzim.
Grupi i punës i përbërë nga Megi Hoxha, Kasem Ndreu, Suzana Sinakoli dhe Genti Kolaj janë ngarkuar nga Jori për peshimin dhe monitorimin e mbetjeve, proces gjithashtu mashtrues. Pro aktiviteti kriminal konsiston tek zhdukja e mbetjeve të rrezikshme spitalore pa asnjë gjurmë nga kompania ‘Eco Riciklim’.
Në kontratën e firmosur, Arbër Teqja duhet ta paraqesë dokumentacionin e depozitimit të hirit në një subjekt të licencuar. Pasi ka marrë paratë, Arbër Teqja jo vetëm nuk e ka trajtuar hirin e mbetjeve, por ka paraqitur dokumente false, të pranuara nga koka e korrupsionit dhe aferave, Enkelejdi Joti. Arbër Teqja ka paraqitur dokumente të rreme sikur hirin ia ka dhënë kompanisë Albtek Energy, një mashtrim ky për të mbuluar krimin.
Skandali nuk konsiston thjeshtë tek vjedhja e parave publike, por tek krimi mjedisor dhe kundër shëndetit të njerëzve, pasi mbetjet spitalore mbartin një rrezik vdekjeprurës dhe katastrofik, ndaj edhe për trajtimin e tyre ka rregulla të prera.
Legjislacioni shqiptar parashikon që përpunimi dhe asgjësimi i mbetjeve spitalore kryhen nëpërmjet djegies ne impiante te posaçme. Ligji ndalon rreptësisht groposjen e mbetjeve spitalore. Çdo veprim tjetër me mbetjet spitalore, përveç djegies dhe trajtimit të hirit është krim i rëndë.
Problemi qëndron se Eco Riciklim ka marrë edhe rreth 40 tendera të tjerë në shëndetësi për gjoja asgjësimin e mbetjeve spitalore?
Ku kanë përfunduar këto mbetje?
A ka dokumentacion për asgjësimin e tyre sipas ligjit?
Kush i ka monitoruar këto kontrata? Detajet në vijim./Pamfleti