Sali Berisha ka konfirmuar ditën e djeshme se do të shkojë për të dëshmuar pranë Strukturës së Posaçme Kundër Krimit të Organizuar dhe Korrupsionit sa i takon aferës së privatizimit të ish-klubit sportiv “Partizani”.
Kreu i “Foltores” është në listën e personave që do të merren në pyetje nga SPAK për hetimin në lidhje me padinë e bërë për privatizimin e ish-kompleksit Partizani. Ndërkohë ditën e djeshme Berisha është shprehur për gazetarët jashtë seancës plenare se do të paraqitet në SPAK sa herë ta thërrasin.
Madje ai ka theksuar se kryeministri Edi Rama përpiqet të mbulojë aferat e tij me çështje të tilla. “S’kam marrë asnjë flet thirrjeje nga SPAK por nëse po do i përgjigjem çdo fletë thirrjeje. Është totalisht përpjekje mjerane nga Rama për inceneratorët dhe çështje të tjera. Unë shkoj gjithmonë sa herë të thirrem, sidomos kur bëhet fjalë për një organ akuze edhe pse notohet në detin e falsitetit unë nuk hezitoj kurrë të përgjigjem”, deklaroi Berisha.
Reagon Malltezi Por sa i takon hetimeve të nisura nga SPAK për privatizimin e ish-kompleksit “Partizani” ka reaguar dje edhe dhëndri i ish-kryeministri Sali Berisha, Jamarbër Malltezi. Në një shkrim të gjatë në rrjetet sociale, zoti Malltezi e konsideron “përgënjeshtrim i inceneRamës dhe mediumeve të dirigjuara me regji nga Edvin Rama”, ndërsa sqaron se sipas dekretit të Jakomonit, lidhur me shpronësimin e realizuar në 1940 nga Italia, rezulton se janë shpronësuar 9 familje që s’kanë asnjë lidhje me pronarët e vërtetë të kësaj hapësire toke.
“Procesi i kthimit të pronës ka filluar qysh para 30 vitesh nga Nexhat Llagami, Jalldiz Sefa-Begeja, Haki Begeja, Luan Saliaga, Fiqiri Ali-Mehmeti, etj., pra nga pronarët që ishin gjallë kur komunizmi ju vodhi tokën dhe e kërkuan për së gjalli qysh në 1992. Kthimi i pronave ka vijuar nga 1993 deri në 2007, pra mbi 14 vjet, përmes një procesi të gjatë dhe skrupuloz.
Qysh në 1994 e më pas në 1996, 1998, 1999, 2000, 2001, 2006 dhe 2007 janë me dhjetra vendime të ish-komisionit të kthimit të pronave që njohën dhe pjesërisht kthyen pronën tek pronarët legjitime. Brezi i pronarëve të gjyshes sime ndoqën proceset dhe morën vendimet e njohjes dhe pjesërisht të kthimit të pronës”, shkruan ai. Ndërkohë, Malltezi gjithashtu thekson se në procesin e kthimit të hapësirës së ish-kompleksit “Partizani” te pronarët e vërtetë, ish-kryeministri Sali Berisha nuk ka pasur aspak gisht, pasi procesit i ishte dhënë drita jeshile nga qeveria e PS në vitin 2005, me firmë të Anastas Angjelit dhe Blendi Klosit. Ja detaje nga dosja dhe si ka rrjedhur ngjarja E mërkura që lamë pas ishte dita kur nisi radha e marrjes në pyetje të personave që kanë dijeni për çështjen e aferës së privatizimit të ish kompleksit Partizani.
Ish-ministri i Mbrojtjes Fatmir Mediu, pa praninë e një avokati, është paraqitur dje në ambientet e Prokurorisë së Posaçme (SPAK), ku është marrë në pyetje. Ndërsa për çështje ditësh, në zyrën e prokurores Enkelda Minollai, e cila po heton aferën e privatizimit të ish-kompleksit, pritet të thirren edhe ish-kryeministri Sali Berisha dhe dhëndri i tij, Jamarbër Malltezi, një prej pronarëve kryesorë të pallateve që fshiu gjurmët e kompleksit Partizani.
Privatizimi i kompleksit ‘Partizani’ është një dosje që tashmë e ka në dorë Prokuroria e Posaçme. Ka qenë kreu i grupit Parlamentar në PS, Taulant Balla i cili ka paditur në vitin 2020, ish-kryeministrin Sali Berisha, ish-ministrin të Mbrojtjes Arben Imami, anëtarë të tjerë të qeverisë së drejtuar nga Berisha, Jamarbër Malltezi dhëndrin e Sali Berishës, përfitues direkt i kësaj prone si dhe drejtues të shtabit të ushtrisë shqiptare bashkë me administratorët dhe aksionerët e dy kompanive ndërtuese në atë kompleks. Prokuroria e Posaçme Kundër Korrupsionit dhe Krimit të Organizuar po e heton çështjen e privatizimit të kompleksit ‘Partizani’ për pastrim parash.