Bazuar në një hetim të shërbimeve partnere dhe të Krimit Ekonomik në Shqipëri rezulton se Tirana është mbushur me celula call center, përmes të cilave mashtrohen qindra qytetarë të vendeve të BE-së, duke u zhvatur miliona euro.
Call centerat kamuflohen nëpër Tiranë si biznese të ndryshme, si konsulence, trajnimesh etj., ndërsa kanë nisur të funksionojnë edhe në grupe të vogla nëpër skuta pallatesh.
Prapaskena ka të dhëna të pakontastueshme që konfirmojnë se secili shef komisariati ka dijeni të plotë për vendin e ushtrimit të aktivitetit kriminal, po në këmbim të mosveprimit merr 20-30 mijë euro në muaj nga secila qendër mashtrimi.
Për shembull, vijon i qetë aktivitetin kriminal të mashtrimit me bursa një call center pranë burgut 313 në Tiranë, i administruar nga Erald…, i cili paguan shefin e komisariatit, histori për të cilën do të flasim në vijim, përfshirë ‘ujkun e call centerave’ Amarildo Gj.
Bazuar në hetimet e shërbimeve partnere, kanë rol kyç në zbatimin e skemave të mashtrimit, punojnë me programet e bursave dhe që janë të stërvitur në fushën e mashtrimit dhe krimit kibernetik, personat si: Adela Xhafaj, Marsilda Leka, Hans Gjini, Edmond Balliu, Aris Hajredinaj, Eljon Pirani, Donalda Kajo, Jetmir Mustafaraj, Heron Kanani, Pajtim Mavriqi, Ednor Lamaj, Lorena Çavo dhe Andora Rexha.
Është goditur deri më tani në Tiranë vetëm qendra e mashtrimit të izraelitit Rafael Genish, me kompaninë GR Capital, e cila operonte me 123 njësi mashtrimi me bursat.
Kokat e tjera të krimit kompjuterit po zgjerojnë aktivitetin me celula të reja dhe fuqizimin e atyre aktuale, sidomos në Kombinat, në zonën e Green City, në Don Bosko, Zogu i Zi, tek Treni, tek Arena Kombëtare, Kinostudio, Kthesa e Kamzës, Laprakë, Fusha e Aviacionit, pranë burgu 313, Rruga e Kavajës etj.
I ashtuquajturi grupi i Durrësit vijon aktivitetin kriminal tek Arena Kombëtare. Kohët e findit ka hyrë në biznesin kriminal të mashtrimit përmes call center edhe një bos mediash në Tiranë, përmes një anëtari të familjes së tij.
Ranjer Gore është gjithashtu një nga bosët e nëndheshëm të mashtrimit me bursa dhe call-centera, por çuditërisht ende nuk ka rënë në duart e SPAK-ut, Byrosë Kombëtare të Hetimit dhe autoriteteve gjermane, që kanë zbarkuar në Shqipëri për të çmontuar celulat e mashtrimit të qytetarëve europianë në Shqipëri.
Paratë e mbledhura, sipas informacioneve të kryqëzuara nga Prapaskena, i ka investuar në pasuri të palujtshme, makina luksoze dhe jetë luksi.
Ilir Shkurti i kompanisë BLUENERGYCALL SHPK, Erion Kasmi dhe Xhulian Xhafa janë goditur nga SPAK dhe gjermanët, por rrethi i tyre vijon aktivitetin në forma të tjera.
Pjesë e rrethit janë edhe Erindi Pysqyli, Berlando Saraçaj, Ndriçim Sula, Arbana Bushaj, Anila Toska, Suela Toska, Gjergj Rebi, Xhuvane Xhabrahimi, Bora Kamberaj e Pietro Kuqi.
Skema e mashtrimit është tashmë e njohur. Subjekti apo viktima e mashtrimit regjistrohet fillimisht në platformën e mashtrimit me emër, mbiemër, email dhe numër telefoni. Autorët e kontaktonin menjëherë në telefon dhe krijojnë një bazë besimi me klientin e pretenduar.
Fillimisht klienti tundohet të investojë në sasi të vogla, me premtimin se brokeri-ndërmjetësi i pretenduar i faqes se investimeve do të realizojë një fitim të madh me investigimin e aksioneve dhe valutave të kriptuara.
Ky premtim i bazuar në një platformë fiktive, e cila ka për qëllim mashtrimin e viktimave nëpërmjet sistemeve kompjuterike, për përfitime të padrejta ekonomike, është i rremë.
Klienti nuk mund të tërheqë paratë që ka hedhur, por joshet të shtojë shumën deri në momentin kur mashtruesi humbet gjurmët dhe zhduket, duke tërhequr më pas pararë përmes një mekanizmi të sofistikuar.