Juventusi fitoi 2-1 ndaj Milanit duke përmbysur golin e Piatek, i cili kaloi kuqezinjtë në avantazh në pjesën e parë.
Në pjesën e dytë Dybala me 11-metërsh dhe talenti i ri bardhezi, Moise Kean shënuan dy golat që i dhanë 3 pikë të tjera skuadrës së Max Allegrit.|
Sfida nisi mjaft mirë për Milanin, që ishte rreshtuar mirë në fushë dhe tregoi një shpirt shumë të lartë gare, duke rrezikuar disa herë kuadratin bardhezi.
Rasti më i mirë ishte ai i minutës së 34-t, kur një krosim i kthyer drejt zonës nga kuqezinjtë, u përplas në dorën e Alex Sandros, por arbitri Fabri djallosi gjithçka.
Ndonëse shkoi të rishikojë aksionin në monitorët e VAR dhe pavarësisht se prekja me dorë e mbrojtësit brazilian të Juves, ishte më se e qartë, Fabri akordoi vetëm goditje nga këndi.
Megjithatë vetëm pak minuta më vonë, në të 39-ën, ishte Bakayoko që rikuperoi një top në gjysmëfushën e Juventusit dhe shërbeu menjëherë për Piatek, ndërsa polaku nuk fali, duke kaluar Milanin në avantazh.
Megjithatë, atë që nuk e bëri në pjesën e parë për Milanin, Fabri e bëri në 45-minutëshin e dytë, kur vërshëlleu një penallti për Juventusin në minutën e 59’, pas një faulli në dëm të Dybalës.
Ishte vetë numri 10 i Juventusit që mori përsipër ekzekutimin e 11-metërshit dhe e konvertoi në gol, duke mposhtur Reinën dhe rikthyer baraspeshën.
Pavarësisht barazimit, sërish protagonistë në fushë ishin kuqezinjtë e Gattusos, që dukej qartë se kishin më shumë dëshirë për të fituar sfidën, ndonëse golin e gjeti Juventusi.
Në minutën e 84-t ishte sulmuesi i ri i talentuar, Moise Kean, që pasi mori një asist nga Pjaniç, gjuajti bukur duke çuar topin në cepin e portës së Reinës dhe duke kaluar bardhezinjtë në avantazh.
Me këtë fitore, Juventusi shkon në kuotën e 84 pikëve dhe matematikisht është vetëm 3 pikë larg titullit të 8 radhazi të kampionit të Italisë. Nga ana tjetër, Milani tashmë duhet të bëjë tifo për Interin nesër në përballjen ndaj Atalantës, për të ruajtur vendin e katërt të renditjes.