Nga Odise Kote
Pas 12 ditësh i mbajtur në morg, zhurmës së pashoqe mediatike dhe nekropolitikës së neveritshme, K.Kaçifas përcillet për në banesën e fundit. I qoftë dheu i lehtë dhe u prehtë në paqe!
Nuk dihet ende e vërteta, (çfarë nuk sheh e dëgjon me sytë e veshët e tu, mos e shpik me gjuhë) se kush e krijoi, inspiroi dhe e përdori si “terrorist” apo “çlirimtar” të Vorio Epirit fatkeqin, djaloshin 35 vjeçar?
Cila politikë apo traditë nacionaliste në Greqi kishte nevojë për një histori të tillë? Që ditën e parë të ngjarjes (të tilla ndodhin kudo e rëndom në Europë, ShBA, Australi etj) në Bularat u turrën “intriguesit” “thurrësit e historisë së mitit hero”, d.m.th manipuluesit.
Ata e dinë mirë se rrëfimi dhe dokumenti si intencë do t’ju duhet vite e dekada më pas, pasi shoqëria ka raport thelbësor midis kujtesës dhe historisë ku fiksioni është i pashmangshem. Manipuluesit përmes deklaratave, komenteve, kërkesave, pretendimeve, të paqënave, nisën të krijonin “Mitin e djaloshit hero”.
Por K. Kaçifas nuk bën për këtë mit, pasi njeriu i vogël edhe në kodër mbetet i vogël.
Nekropolitika, nisi ta ushqejë për 12 ditë me rradhë mitin me gënjeshtra nacionaliste, duke e bërë gjithnjë e më tepër hileqar e të urritur.
Miti i rrejshëm e ka fillimin ndjellës dhe fundin të hidhur. Nga mitet e rrejshme lindin frymëzime që i kanë shkaktuar njerëzimit vuajtje te mëdha, duke kryer masakra, krime të përbindshme, vrasje në masë, djegie e rënime. Bota ka njohur mjaft të tilla. Por pamundësia për të thënë plotësisht të vërtetën nuk do të thotë se është e nevojshme gënjeshtra. Ndoshta prej këtyre mësimeve të vyera, mund ta kenë shtysën e tyre reagimet e menjëhershme të zërave më të spikatur që erdhën menjëherë nga opinioni dhe shoqëria greke. Duke thënë një të vërtetë, mund të thuhen edhe dhjetë të tjera.
14 deputetë grekë akuzuan TV kombëtar STAR për lajme të rreme e manipulim të opininit publik. Kryetari i parlamentit grek nuk pranoi kërkesën e Agimit të Artë për një minutë heshtje. Ishministri i arsimit, ish ministri i jashtëm Pangallos, ministria e kulturës greke, dhjetra dëshmitarë në ngjarje, intelektualë e qytetarë të ndershëm për herë të parë në mardhëniet delikate mes dy vendeve, i dhanë fund një operacioni manipulimi të opinionit publik.
Sepse K.Kaçifas nuk ishte një “hero” dhe nuk bënte për mit…
U prehtë në paqe!