Juristi Romeo Kara, ka hedhur akuza ndaj ish-kryeministrit Sali Berisha. Me anë të një postimin në rrjetet sociale, ai deklaroi dje se Berisha bënë deklarata duke premtuar të drejtën e votës, ndërsa theksoi se si mund të kesh pasur demokraci dhe liri, me gjysmën e popullit pa të drejtën e votës deri më tani.
“Ka 31 vjet që merr merita si udhëheqësi “legjendar”, që solli demokracinë dhe lirinë dhe tani na çudit, duke na premtuar të drejtën e votës.
Se si paskemi pasur demokraci dhe liri, me gjysmën e popullit pa të drejtën e votës deri më tani, këtë gjë vetëm “legjenda” e di. Kemi vite që çirremi se diaspora nuk po gëzon të drejtën e votës, por u desh shpulla “non grata” që “legjendës” t’i vije mendja, goja dhe terezia për këtë problem.
Pak ditë më parë premtoi sërish për të disatën herë se do të kthente pronat, të cilat i sakatoi dhe i tjetërsoi në mënyrën më kriminale të mundshme duke rrënuar gjithë thelbin e sistemit”, tha ai.
Juristi deklaroi se Berisha premtoi se do të përkrahte të persekutuarit, të cilët sipas tij së bashku me Azem Hajdarin i nxori me dhunë në mes të natës nga greva e urisë në fillimvitet ‘90.“Po ashtu, premtoi se do të përkrahte sërish të persekutuarit, të cilët së bashku me Azem Hajdarin, i nxori me dhunë në mes të natës nga greva e urisë në fillimvitet ‘90.
A thua se nuk e dogji për faj të tij veten, në 2013 i persekutuari Lirak Bejko. Dy herë ishte në pushtet dhe pikërisht dy herë, ose më saktë 13 vite në krye të pushtetit, me fakte e prova, të thëna e të pathëna, tregoi se ishte armiku me i madh i të dyjave shtresave të sipërpërmendura dhe votës së lirë.
Tani, gërdalla 78 vjeçare e hazdisur nga pickimi non grata, do punojë pikërisht kundër asaj çfarë bëri 13 vite të sterrosura të pushtetit të tij familjar. Pikërisht këtë po na servir për ta besuar “ujku i ngjirur i foltores”, tha ai.