uristi Romeo Kara ka komentuar zhvillimet e fundit në politikën shqiptare. Në një prononcim për gazetën “SOT”, avokati ka paralajmëruar një fund tragjik për ish-kryeministrin Sali Berisha. Sipas tij, lufta që “non grata” iu ka hapur amerikanëve dhe britanikëve ka një qëllim të fshehtë.
Për avokatin, Berisha po përgatitet për të krijuar një ushtri si garanci për të shpëtuar nga burgu. “Berisha tashmë ka instaluar një retorikë boshe, mohuese ndaj çdo akuze kundër tij, antiperëndimor dhe destabilizuese, me qëllim sigurimin e mbijetesës së tij dhe familjes së tij.
Ai përpiqet të shitet si “Mesia”, “ndërgjegjja e kulluar”, kundër të cilit po komploton e gjithë bota demokratike. Ai po shfaqet si morali më i lartë, përballë të cilit do gjunjëzohen të gjitha superfuqitë perëndimore.
Berisha i zënë në kurthin e marrëzive dhe mëkateve të tij, tashmë ngjan plotësisht me Hitlerin në fillim të vitit 1945, kur fajësonte dhe mallkonte USA-t dhe Britaninë si fuqi të së keqës, që luftonin pa moral, thjesht për para dhe të paafta të mundnin atë dhe Gjermaninë naziste.
E liga kudo qoftë ka të njëjtën fytyrë dhe të njëjtën retorikë: mohim, shpifje, sharje dhe kërcënim. Berisha me këtë qëndrim thjesht do që të konsolidojë një detashment antiamerikan dhe antidemokratik në Shqipëri, si garanci të mbijetesës së tij dhe kërcënim destabilizues. Nuk ka fakt më të madh kundër tij se sa pasurimi i tejskajshëm i tij dhe i familjes së tij ndërkohë që ai ishte në krye të pushtetit, që Shqipëria u zhbë, populli mori rrugët e kurbetit dhe krimi u bë zot i vendit dhe pushtetarët u bënë grabitës dhe pronarë të pasurive publike.
Arsidi, CËZ, ARMO, ALBPETROL, “Shqipëria Një Euro” etj, janë disa nga faktet kokëforta dhe të pakundërshtueshme, të cilat zhbëjnë çdo deklaratë shfajësimi të Berishës dhe kopesë së tij grabitqare”, u shpreh Romeo Kara.
Qëndrimi i fortë i SHBA dhe Britanisë ndaj Berishës
Avokati teksa është pyetur në lidhje me qëndrimin e fortë të Britanisë dhe Shteteve të Bashkuara të Amerikës kundrejt ish-kryeministrit ka zbuluar arsyet si “non grata” u hodh poshtë nga palët amerikane.
Juristi e lidh me faktin se Berisha u kthye në një anti-reklamë e sistemit demokratik me korrupsionin dhe hajdutët që solli në pushtet. Jo vetëm kaq , por Romeo Kara rikujton edhe tentativat e ish-kryeministrit me Gazpromin dhe Iranin që solli menjëherë reagimin e SHBA dhe Britanisë duke e grupuar tek “lista e zezë” e politikanëve.
“Arsyeja është tepër e qartë: Berisha i cili ka qenë kanakari i tyre, i përkëdheluri i parë i tyre pas ndërrimit të sistemit, u kthye në një autokrat dhe kleptokrat ku sundimin e ligjit e zëvendësoi me pushtetin e tij personal dhe të hajdutëve të cilët ai solli në administratë, legjislativ dhe sistemin e drejtësisë.
Berisha u kthye në një anti-reklamë e sistemit demokratik në Shqipëri dhe pengmarrës të tij, duke radhitur veten dhe pasuesit e tij krah vendeve jomiqësorë më botën demokratike dhe me Shqipërinë gjithashtu. Përpara pak kohësh, u bënë të njohura për publikun, nga ish-nëndrejtori i Albpetrolit, Pajtim Sula, tentativat e tij më Gazpromin dhe Iranin, gjë që solli një reagim direkt të palës amerikane.
Përtej retorikës bajatet e tij, Berisha duhet ballafaquar patjetër më drejtësinë. Kjo është çështja, kjo është sfida. Ky armik i njerëzve të ndershëm dhe i popullit të tij, duhet zhveshur nga ajo që ka vjedhur e grabitur dhe duhet bërë shembull ndëshkimi, ashtu siç e ka lypur, ashtu siç e meriton. Boll kemi dëgjuar Berishën, tani duhet të dëgjojmë drejtësinë”, u shpreh juristi.
Kulla në mes të Tiranës fundos Berishën
Në një reagim në rrjetet sociale avokati Romeo Kara ka komentuar pazaret e fshehta dhe skenarët e Sali Berishës për ndërtimin e kullës në qendër të Tiranës. Juristi ironizon reagimet e Shkëlzen Berishës dhe hedh dyshimet e forta si ish-kryeministri është në pritje të ditëve përvëluese.
Madje, Kara shprehet se për “non gratën” po vjen fundi pasi edhe kërcënimet i kanë mbaruar. Nuk harron pa përmendur edhe se kulla 64 katëshe te gropa e Hajdin Sejdisë është simbol i mashtrimit në Tiranën e viteve ’90. Sipas avokatit, po e njëjta skemë përsëritet, por këtë herë do të jetë Berisha ai që do të fundoset.
“Kur të sfidon me kërkesë për revokim një non grat e bir non grate, që vetëm para pak kohesh nuk linte asnjë rast pa ngritur padi për shpifje, kuptohet qartë se, sa mirë e njohin akuzuesit publikë te tij dhe se sa të vërteta janë akuzat e ngritura ndaj tij.
Aq mirë e njohin, sa që Saliut i kanë mbaruar fjalët, skërmitjet dhe kërcënimet publike, ndërsa Zenit paditë për shpifje i kane ikur në drejtim te paditur. Gjithmonë zullumi këputet duke u trashur. Makiaveli do ta vlerësonte Berishën pikërisht nëpërmjet njerëzve të cilët rrinë rreth tij, tashmë të bërë plotësisht publike, ndërsa Tuqididi do ta vlerësonte ligësinë e tij, nisur nga etja e tij për pushtet shoqëruar nga ambicia tërësisht personale apo familjare.
Me sa duket, ai park i kthyer per shume vite ne grope-kurth për Hajdin Sejdine, shumë shpejt do të groposë vetë kurthaxhiun e tij. Ajo quhej Gropa e Hajdinit, ndërsa kjo do të quhet Kulla e Saliut”, shkroi juristi.
Heshtja e Sali Berishës për ndërtimin e kullës
Juristit Romeo Kara nuk “i shpëtoi” pa analizuar as heshtja e “non gratës” pas gjithë “zhurmës” që u krijua nga nisja e ndërtimit të “përbindëshit” në mes të qendrës së Tiranës. Pikërisht se Sali Berisha nuk po reagonte ndaj akuzave që po i ngriheshin, ndryshe nga çfarë ka bërë më parë, u hodhën themele të forta dyshimi se fshihej një ‘marrëveshje’ sekrete.
Avokati shton në biografinë e ish-kryeministrit edhe skandalin e fundit, madje duke i vendosur epitetin “Sali Kulla”. “Saliu u ngujua tek Kulla e pa ngritur e turpit. As fjalët dhe as fytyra nuk po i vijnë qoftë edhe për një justifikim siç e ka zakon.
Pas kaq ditësh, nuk ka më vlerë asnjë prononcim prej tij. Heshtja këtë radhë buçiti më shumë se çdo gjë tjetër. Tani e tutje nuk do të quhet më vetëm Sali Gërdeci dhe Sali “non grata”, por edhe Sali Kulla… Nga kulla u nis, tek kulla u bitis…”, shprehej në rrjetet sociale avokati Kara.