Pas një interviste të fortë të presidentit në shtypin italian, Jari vendosi të ndajë me mbështetësit e vet vlerësimet e larta që ai ka për presidentin, sa i përket njohurive në fushën e drogës:
“Të dashur demokratë,
Jari ju sqaron!
E lexova me vëmendje intervistën e presidentit Meta në shtypin italian.
Është shumë e rëndësishme ajo që ai ka theksuar, se fitimi nga marrja me drogë në Shqipëri është më e lartë se në Itali apo Gjermani.
Kjo vjen pas një vëzhgimi të hollë që ka bërë presidenti dhe pas një anketimi të njerëzve të tij që punojnë në këtë fushë në Shqipëri, Itali, Gjermani apo Angli.
Nga studimi ka dalë se kur shet një kg drogë dikush në Shqipëri, ai ka shumë pak detyrime për të paguar, se shumicën e punëve i bën vetë.
Në Perëndim, ai duhet të paguajë shtrenjtë shpërndarësit dhe gjithë rrjetin e sigurisë.
Shto nga ana tjetër që në Perëndim e ke të vështirë t’i fusësh paratë në bankë, kurse në Shqipëri mund të blesh me cash sa të duash.
Kjo e ka bërë shumë të ndjeshme çështjen e drogës në Perëndim dhe ka shqetësuar autoritetet e Perëndimit.
Me këtë konkurrencë të pandershme që ua ka shpjeguar presidenti, Shqipëria rrezikon shumë nëse futet në BE, pasi për të njëjtën punë, shqiptarët fitojnë më shumë.
Ndaj kjo ka mobilizuar shumë liderët perëndimorë të mos e pranojnë Shqipërinë në datën 18 tetor, pasi nuk plotëson pikën më kryesore, konkurrencën e ndershme dhe transparencën e të ardhurave ekonomike.
Për këtë, presidenti ka meritë të veçantë jo vetëm se ka përdorur gjithë njohuritë e veta në tregun e drogës, por i ka prekur të huajtë në një pikë delicate, që ata nuk e tolerojnë.
I juaji, Jari!”