Pas lajmeve tronditëse për tërheqjen dhe zbutjen përfundimtare të “komandantit të Përgjithshëm” në çështjen e dekretimit të Sandër Lleshit, Jari u përpoq t’i japë zemër vetes dhe ta kthejë dhimbjen në forcë.
Dhe u bëri nga një telefonatë 3 demokratëve të Kombinatit, të vetmit që i kishin mbetur besnikë dhe e dëgjonin edhe pasi iku nga Presidenca.
Për çudinë e tij, të tre ata nuk e konsideronin fare këtë “betejën” e “komandantit të Përgjithshëm”, por të gjithë ishin shumë të shqetësuar me luftën brenda llojit në PD.
Atyre u kishte bërë përshtypje shumë që një Sej(a)men i Lulit kishte sulmuar shumë ashpër deputeten Jorida Tabaku, dhe se kjo po kthehej në fenomen.
Sipas tyre, në ditën më të keqe të parties, të godisje edhe ata pak që kishin mbetur me një sy në mes qorrave, ishte një gjë shumë e rëndë për opozitën.
Ata mendonin se kjo do t’i ulte shumë shanset për rikthimin e Partisë Demokratike në pushtet, ndaj Jari e mori shumë seriozisht, dhe nisi të shkruajë mesazhin e mëposhtëm:
“Të nderuar miq. Jari ju informon!
Shqetësimi për sulmin ndaj Jorida Tabakut të njërit që e ka caktuar veten gazetar në moshën 50 vjeç, nuk duhet të na dekurajojë dhe të na vrasë shpresën tek fitorja që po afron.
Ndonëse edhe vetë Doktori e ka quajtur atë si “këshilltarin mizerabël” të Lulit, me përgjegjësi kryesore në humbjen e zgjedhjeve të vitit të shkuar, këtu nuk ka aspak vend për t’u shqetësuar.
Sepse të gjithë duhet ta kuptojmë se fushatat elektorale duan shumë lekë dhe Luli po përpiqet që tani që ato të mos mungojnë.
Por ndërsa në 2017-ën, raporti i atyre deputetëve që paguan tek kunati me ata që e hëngrën qyl, ishte 60 me 40 përqind, në zgjedhjet e ardhshme situata do të ndryshojë katërcipërisht.
Ndaj ta harrojnë Jorida Tabaku, Florjon Mima, Aldo Bumci, Edi Paloka, Oerd Bylykbashi, Gent Strazimiri e ndonjë tjetër, të cilët hynë këtë radhë në parlament pa lekë, se do të përsëritet prapë historia.
Ose do të paguajnë si gjithë të tjerët, ose të shkojnë në punën e tyre.
Nga ky rregull do të bëjë përjashtim vetëm Doktori, të cilin do ta kemi në vend të hudhrës në parlament, sa të jetë gjallë, ose sa të ekzistojë reforma në drejtësi.
Nga ky rregull nuk bëj përjashtim as unë, sepse i kam marrë masat që, kur të kandidoj për deputet, do të shes njërën nga pronat e gruas që përfituam kur isha president.
Kjo do të zhdukë edhe diferencat që kanë deputetët me njëri-tjetrin, pasi nuk ka si të jenë njëri i nënës e tjetri i njerkës, sepse do të trajtohen të gjithë njësoj.
Për këtë projekt ka dhënë miratimin e vet edhe Doktori, me klauzolën që në komisionin e rekrutimit të ketë përqindjen e vet edhe zyra e Zenit.
Sipas tij, Luli e ka menduar mirë dhe kjo është realisht një formulë fituese, sepse secili që do të futet në listë, do të lërë kokën në fushatë, sepse e ka betejë për lekët e veta.
Ndaj mos u shqetësoni kot për sulmet e Sej(a)menit dhe të ngjashmëve me të mbi figurat kryesore të PD-së që kanë mbetur, sepse bëhen me qëllim të mirë.
I juaji, Jari!”