Dështon plani i Ilir Metës dhe Sali Berishës për të bllokuar gjetjen e një pakti mes Kosovës dhe Serbisë. Rezultate e zgjedhjeve në Kosovë nxorën fitimtar Albin Kurtin dhe të gjithë tani janë në ethet e koalicionit të ri. Sytë janë te LDK, e cila duhet të vendosë nëse do bashkohet me Vetëvendosjen për të qeverisur vendin, apo do kthehet nga PDK dhe të jetë ajo drejtuesja e qeverisë.
Megjithatë, Albin Kurtit ka shpallur fitoren dhe pritet të jetë ai kryeministër. Por këto zgjedhje sollën mjaft komente në Tiranë e në Prishtinë. Të gjithë tani shtrojnë pyetjen: Çfarë do të ndodhë me paktin Kosovë-Serbi? Albin Kurti njihet si ndër politikanët më atdhetarë dhe më kritikë ndaj Serbisë. Për këtë arsye ka shumë skeptikë. Por zgjedhjet e së dielës sollën disa ndryshime. Ramush Haradinaj, që u shfaq si antiserbi më i madh doli ndër të fundit në zgjedhje. Ai gazonte në Tiranë mbështetjen e Sali Berishës dhe Ilir Metës, dy figurat që e nxitën të dilte kundër SHBA për paktin Kosovë-Serbi. Por rënia e Haradinajt do të thotë se dhe plani Meta-Berisha u varros. Edhe pse Kurti mund të jetë kryeministër, shanset që të kemi një pakt Kosovë-Serbi janë sërish të larta. Shumë muaj e deri të dielën, ai nuk ka folur fare për këtë çështje, duke dhënë sinjale se diçka po ndryshon. Po ashtu ai në fjalimin që mbajti në fushatë deklaroi se do ketë marrëdhënie shumë të mira e me ndërkombëtarët dhe se do ketë vijim të dialogut me Serbinë. Madje ai dje tha se është gati që me ndihmën e ndërkombëtarëve të diskutojë me Serbinë, në mënyrë që kjo e fundit ta kuptojë se u ka borxhe shqiptarëve.
“Unë jam i interesuar që me faktorët ndërkombëtar ta krijojmë kontekstin e drejtë në të cilën Kosova i kërkon borxhin Serbisë që ishte agresore, okupatorë ku në fund dhe tentoi gjenocidin mbi popullin tonë”, tha Kurti. Fakti që Kurti kërkon bashkëpunim ndërkombëtarë do të thotë se pjesë e axhendës do jetë dhe çështja me Serbinë. Si SHBA, ashtu dhe BE kërkojnë që konflikti të marrë fund një herë e mirë. Lidhur me mundësinë nëse do ketë apo jo një pakt Kosovë-Serbi ka reaguar dje dhe gazetari Baton Haxhiu. Në një studio televizive ai tha se fitorja e Vetëvendosjes nuk do të ndikojë në këtë aspekt. Sipas tij, Donald Trump ka dërguar një person special për këtë çështje dhe askush nuk e ndal dot paktin. I pyetur mbi një deklaratë të Albin Kurtit, i cili është shprehur se tashmë Kosova do të përfaqësohet në dialogun me Beogradin nga përfaqësues legjitimë, ndryshe nga ata që ishin, Haxhiu u shpreh: “Nuk ka dyshime që do të ulen dhe do të bisedojnë. Njeriu i cili vjen për të kryer punë në emër të SHBA nuk ka kohë për të pritur dhe për të sqaruar shumë gjëra të së kaluarës, sepse ata të kaluarën e dinë. Diskursi retorik nuk do të jetë në tavolinë, se nuk kanë kohë që t’i presin institucionet e Kosovës, ata do ta kenë draft- in e gatshëm, domethënë e ke draft- in për negociata , por brenda është shumë pak i negociushëm”. Më tej, Haxhiu shtoi se Kurti do ndihmojë që në këtë mes Kosova të dalë e fituar. “Këto gjëra janë të shpejta për arsye se ka shumë probleme në botë për t’u zgjidhur që mund ta presin problemin Kosovë- Serbi dhe këtu është ajo pika kritike. Pozicioni i Albin Kurtit do të jetë shumë i vështirë , besoj që ai duhet të jetë super kreativ, super bindës dhe gjithashtu ta arrijë marrëveshjen, t’i bindë 5 vendet e BE-së për ta njohur Kosovën, liberalizimin e vizave”, u shpreh Haxhiu. /Kliti Topalli